Shillong, Nohprah 07
Ka Aston Villa ka la lah ban pynliem ïa ka Manchester City da 1-0 kol ha ka ka sngi Balang na ka bynta ban pynlong ïa kane ka lahduh jong ka Premier League ha ka aiom ba la dep ban hiar sha ka kyrdan basaw.
Kane ka nam jop ka la wan urlong lyngba u Leon Bailey hashwa ban kut artad ka jingïalehkai.
Ka jingïai ap khmih lynti u Unai Emery ban kyntiew ïa ka Villa ka la wan urlong, ha kaba ka la lah ban ïalehkai bha mynta ka aïom hadien katto katne snem bad mynta kane ka kynhun ka la jam sha ka kyrdan balai.
Watla kine ki kynhun kim shym la lah ban thep kol, hynrei shwa ban wai ka Villa ka la lah ban pynurlong ha ka minit kaba 74. Kane ka wan lyngba u Bailey uba la ïoh ban rah ïa ka bol naduh napdeng madan, ha kaba u la ïoh ban shut ia ka bol bad ka la leit dei na u rangïalehkai ‘dien ka City u Ruben Dias bad ka la rung hi jlang sha kol.
Ha ka jingshisha ka Aston Villa ka la dei ban ïoh thep biang sa shi kol hadien shi minit ba u Douglas Luiz u la ïoh ban shut bad ka la leit dei na diengkol ha Villa Park.
“Ka long ka jingïalehkai kaba itynnad bha lyngba ka jingbun ki paidbah nongkyrshan ka Aston Villa,” la ong u Bailey. “Ka long ka jingsngewsarong ban long kum u nongthep kol bad ban khur ïa ka jingjop.”
Lyngba kane ka jingshah rem, ka kynhun u Pep Guardiola ka dangïai sah 30 point hadien ki 15 sien ïakhun bad ka dangduna hynriew hynriew point na ka Arsenal kaba dangbat ïa ka kyrdan ba hakhlieh ha ka Premier League.
Ha kawei pat ka liang ka Aston Villa ka la jam sha ka kyrdan balai bad kamai 32 point bad ka dangduna ar point hadien ïa ka Liverpool bad saw point ïa ka Arsenal.
Ha kane ka jingïakhun ka City ka la duh noh ia ki ar ngut ki rangïalehkai shapdeng kata u Rodri (uba dangshah sospon) bad u Kevin De Bruyne uba dangdon hapdeng ka jingmynsaw.
Ha kawei pat ka jingïakhun, ka Manchester United ka la pynliem noh ïa ka Chelsea ha la ïing da 2-1 kol bad kane ka la wan urlong lyngba u Scott McTominay.
Ha kane ka jingïakhun ka United hapoh ka jingïalam u Erik ten Hag ka la lah ban ïalehkai bha naduh kaba sdang kat haduh ba ka la lah ban khur ïa ka jingjop.
Lyngba kane ka jingjop, ka United ka la jam sha ka kyrdan ba hynriew bad kamai 27 point, katba ka Chelsea ka dangïai sah ha ka kyrdan ban shiphew bad 19 point.
