Shillong, Nohprah 07
Ka Germany kan ïakynduh pyrshah ïa ka Scotland ha kaba sdang jong ka Euro 2024 ka ban long ha Munich hadien ba la dep ka jingpynïakap (draw) ïa ki kynhun, katba ka Italy kaba dei ka lahduh jong u 2020 ka la shah pynngat ha kajuh ka group bad Spain.
Kane ka lympung ïalehkai ka ban neh haduh shi bnai kynthih ha ka 14 tarik u Jylliew ha Munich bad ïa ka final yn pynlong ha 14 tarik u Naitung ha Olympic stadium kaba ha Berlin.
Ïa kane ka jingpynïakap ïa ki kynhun ha la ki jong ki group, la pynlong ha ka sngi Saitjaiñ ha Elbphilharmonie concert hall kaba ha Hamburg, ha kaba ka Germany ka la shah kynthup lang ryngkat ka Hungary, Switzerland bad ka Scotland kiba don ha ka Group-A.
Ha kane ka lympung ka Italy ka la shah kynngap ha ka thup kaba kham eh (group of death) namar ka dei ka kynhun kaba la bat ïa ka nam lahduh, ha kaba ka la don ha ka Group-B kaba kynthup lang ïa ka Spain, Croatia bad ka Albania. Ka France bad ka Netherlands kin ïakynduh pyrshah ha kajuh ka group hadien ba ki la lah ban ïalehkai ha ki lympung ïaknieh rung. Kine ki kynhun ki la don ha ka Group-D kaba kynthup ïa ka Austria bad kawei pat ka kynhun nongjop ka ban ïoh rung na ka ‘playoff A’.
Ka England, kaba la shah rem ha ka final jong ka Euro 2020, ka la don ha ka Group-C kynthup lang ïa ka Denmark, Slovenia bad ka Serbia.
Ha ka Group-E yn iohi ïa ki kynhun kum ka Belgium, Romania, Slovakia basd kawei pat ka kynhun ka ban khur jingjop ha ka ‘playoff B’, katba ha ka Group-F ki long ka Portugal, Turkey, Czech Republic bad kawei ka kynhun ka ban khur jingjop ha ka ‘playoff C’.
Ka Germany ka dei ka kynhun kaba la ïoh rung suk sha kane ka lympung namar ka dei ka ri ka ban pynlong ïa kane ka lympung bad 20 tylli ki kynhun ki ban ïaknieh rung lyngba ka ‘European qualifiers’. Ki lai tylli ki kynhun ki ban ïoh rung lyngba ki jingïalehkai jong ka ‘playoffs’ ka ban long ha Lber jong u snem ban wan.
Ki ar tylli ki kynhun ki ban wan ha ka kyrdan ba hakhlieh na ki hynriew tylli ki group jong ka Euro 2024 kin ïoh rung sha ka pre-quarter final lem bad saw tylli kiwei pat kiba kynsai.
