Agartala, Nohprah:
Ha ka jingïalang ba la pynlong ha ka shlem treikam jong ka seng BJP ha Agartala jong ka jylla Tripura, u Myntri Rangbah jong ka jylla u Prof. Dr. Manik Saha u la pynpaw ïa ka jingsngew skhem ba ka seng Bharatiya Janata Party (BJP) sa shisien kan sa wanrah ïa ka nam ha kaba ïadei bad ka jingjop donburom ha ka jingïakhun ha baroh ar tylli ki Lok Sabha konstitwensi jong ka jylla ha ka ilekshon ka ban sa long ha u snem 2024.
U Dr. Saha u la ong ba ka seng BJP hapoh ka jingïalam jong u Myntri Rangbahduh u Narendra Modi kan sa ïai bteng ban ai ka jingshakri sha ki paidbah. U la pynpaw ka jingkmen kaba khraw halor ka jingjop jong ka seng ïa ka ilekshon Assembly ha ki lai tylli ki jylla bad nangne shakhmat ka jingpyntreikam jong ka seng kan sa nang khlaiñ.
Ka jingïalang kaba la pynlong ka long shi bynta ban ïapyrkhat ïa ki kam-ki jam kiba ïadei bad ka ilekshon Lok Sabha.
