Shillong, Nohprah 08
Saw ngut ki rangïalehkai kickboxing ka Jylla kiba don hapoh ka synjuk jong ka All Meghalaya Kickboxing Association (AMKA) ki la wanrah burom ïa ka Jylla da kaba khur takma ha ka Ambedkar Sports For All and Festival National Kickboxing Championship kaba la long ha ka nongbah Delhi 1 haduh 3 tarik u Nohprah.
Kine ki long u Kordor Rynjah (Junior 50kg Full Contact), Plassing Mynsong (Senior 50kg Full Contact) bad u Royalson Lapang (Senior K1 50kg Men) ki la khur ia ki takma ksiar, katba u Shanbor Kurbah (Junior 45kg Full Contact) u la khur ïa ka takma rupa.
Na ka liang ka AMKA lyngba u President u Bah Samuel Hashah u la pynkup burom ïa kine ki khynnah khnang ba kin dangïai trei shitom ha kiwei pat ki lympung ïalehkai ki ban sa long shen.
