Shillong, Nohprah 08
U Ravi Bishnoi u la ïoh ban bat ïa ka kyrdan ba nyngkong napdeng ki nongkawang bol ha ka T20I, hadien ba u la khur dangshen ïa ka nam Player-of-the-Series pyrshah ïa ka Australia.
Une u rangïalehkai ka ri u la lah ban khur 9 wiket ha ki san sien ïakhun ha katei ka lympung. Kane ka long ka sien kaba nyngkong eh ban ïoh ïa katei ka kyrdan naduh ba u la lah ban khur 35 wiket ha ki jingïalehkai T20I.
U Bishnoi u la ïoh ban knieh noh na u rangïaleh-kai ka Afghanistan u Rashid Khan, kumjuh ïa u Wanindu Hasaranga, Adil Rashid bad u Maheesh Theekshana kiba la don hapoh ka thup kaba san.
Ha ka series pyrshah ïa ka Australia, ka India ka la plie lad ïa u Bishnoi ba un ïalehkai bha kum u nongkawang bol bad u la lah ban pynhap wiket na ka bynta ban khanglad ïa ki nongtied ka liang pyrshah ban kamai run.
Te kumta ka India ka la khmih lynti ba u Bishnoi, un ïai bteng ban ïalehkai bha ha ka T20 World Cup ka ban long ha West Indies
Kham hashwa u nong-kawang bol jong ka ri u Axar Patel u la jam haduh 16 kyrdan na ka bynta ban don ha kaba khadwei. U rangïalehkai ba dang 21 snem ka rta u Yashasvi Jaiswal u la lah ban jam haduh 16 kyrdan na ka bynta ban kynjoh sha ka kyrdan ba 19 hadien ba u la lah ban ïalehkai bha ha ka ICC T20 kaba la kut dangshen.
U rangïalehkai Australia u Travis Head u la ïai sah ha ka kyrdan ba 29 hadien ba u la lah ban ïalehkai bha ha ki san tylli ki jingïalehkai jong ka T20I series pyrshah ïa ka India.
Ha ka kyrdan jong ka ODI, u rangïalehka ka India u Gill (batting) bad u rangïalehkai ka South Africa u Keshav Maharaj (bowling) ki la ïai bat ïa ka kyrdan ba hakhlieh, katba u rangïalehkai ka West Indies u Shai Hope u la jam sha ka kyrdan ba 11 ha ka thup jong ki nongtied jong ka ODI hadien ba u la lah ban ïalehkai bha dangshen ha ka ODI kaba nyngkong pyrshah ïa ka England.
