Chennai, Nohprah:
U Myntri Rangbah jong ka Tamil Nadu u MK Stalin u la ïai bteng ban leit jurip bniah ïa ki thaiñ kiba la shah ktah jur na ka jingwan hap jong u slap uba jur ha Chennai hashwa ka jingwan beh jong ka ‘erïong Michaung. U la leit jurip bniah ïa ka shnong Anakaputhur kaba don hajan ka nongbah ha ka sngi Palei bad u la ïakren ha kaba ïadei bad ki lad ki lynti ban ai ki jingïarap sha ki lanot. U la sam ruh ïa ki jingdonkam baroh sha ki lanot kynthup u khaw, ki kymbor bad kiwei pat ki jingdonkam.
U Stalin ha ka sngi Ba-ar u la phah shithi sha u Myntri Rangbahduh u Narendra Modi ban batai shai halor ki jingjulor ba la wanrah da ka ‘erïong Michaung bad la kyntu ba la dei ban phah kham kloi ïa ka kynhun ka ban khmih bniah halor ki jingshah pynjulor baroh.
U Stalin ha katei ka sngi u la phah ruh ka jingkyrpad ba la dei ban phah shwa ïa ka pisa kaba T. 5060 klur kum ka jingïarap bakyrkieh na ka bynta ban pynbiang ïa baroh ki jingdonkam kum ki lad jingïarap.
