Mahe Island, Nohprah:
Ki bor pyniaid ka Seychelles ha ka Sngi Palei ki la pynbna halor ka jingjia kaba shyrkhei hadien ba 66 ngut ki la mynsaw ha ka jingbthei kaba la khlaiñ bha na kawei ka jaka buh tiar bad kaba la pyntwa ia ki ïing mala bad ki jingtei ba bun kiba don ha katei ka jaka.
La ong ba Seychelles ka dang shu dep mad ia ki jinglynshop jong ki bor ka mariangbad ki la don ruh katto katne ngut kiba la khlad ha kitei ki jingjia. Katba ha kane ka por, ki paidbah ki hap ban mad sa ia kane kawei pat ka jingeh bad jing jynjar nalor ki jingeh bapher bapher ba ki paidbah ki la ioh mad na ka jingjur u slap bad ki jingshlei um ha kylleng ki bynta jong ka ri.
Katei ka jingbthei ka la jia ha ka thaiñ ba kham bun ki karkhana hapoh Mahe, kaba long ruh ka dew lynnong kaba heh duh ha katei ka ri kaba hap hapoh ka Indian Ocean bad la ong ba katei ka jingbthei ka la pynlong ia ki iing bad ki jingtei ba bun kiba don kylleng sawdong jong katei ka jaka ba kin or-pait bad julor lut namar ka jingkhlaiñ jong katei ka jingbthei.
Kumta, ki bor pyniaid ka Seychelles ki la pynbna ia ka jingkhang dam naka bynta ki skul bad ki jaka pule- puthi baroh ha katei ka nongbah bad yn ailad tang ia ki nongtrei bad nongleit- nongwan kiba dei ban iaid lyngba ia katei ka thaiñ kumba ju long man la ka sngi.
Hynrei, tang hadien kumba katto katne kynta, ha katei hi ka Sngi Palei, ki bor pyniaid ka Seychelles ki la pynbna ba la weng noh ia ki jingmaham bad ki adong ba la dep pynbna hashwa namar ka jinglong- jingman baroh ka la iaid beit- iaid ryntih.
