Khliehriat, Nohprah 08
Ka 12-Dolloi FC ka la rah ïa ka nam lahduh jong ka lympung ïalehkai 1st Open to All Veteran Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan urlong hadien ba ka la lah ban pynliem noh ïa ka Ar Dolloi FC da 2-0 kol ha ka jingïakhun final kaba la long ha madan Artificial Turf Diengshynrum, Khliehriat ha ka sngi Thohdieng.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki katto katne ki kabu kiba biang. Hadien shiteng kynta ka 12-Dolloi ka la ïoh ban pynkhih jar nyngkong eh lyngba u Gerald Pdang ha ka minit kaba 32 bad kane ka shi kol ka la neh haduh kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet, ka 12-Dolloi ka la pynbud biang ïa ka kol kaba ar lyngba u Rapdamewan Papang ha ka minit kaba 57. Watla ki rangïa -lehkai ka Ar Dolloi ki la pyrshang ban ïakhun tyngeh na ka bynta ban pynphai, hynrei haduh kaba kut ka jingïalehkai kam shym la lah ban pynurlong bad ka la mad ïa ka jingshah rem.
Ïa ki khusnam sha ka kynhun nongjop bad kynhun ba wan ba-ar la sam da u Ma Andrico Rymbai, Adviser ka EJHDFA bad u Bah Joshua Sajem, Vice President ka EJHDFA ha ka jingdonlang u Bah James Sutnga, Working President ka East Jaiñtia Hills District Football Association.
Ka 12-Dolloi FC ka la ïohpdiang ïa ka song pisa kaba T.30,000 katba ka Ar Dolloi FC ka la ïoh T.20,000 ryngkat ki trophy.
