Moscow, Nohprah:
Katkum ki khubor la iathuh ba kawei ka khynnah 14 snem na Russia, ka la siat ia ki para ba ia pule lang ha kawei ka skul hapoh ka nongbah Bryansk jong ka katei ka Ri ha ka Sngi Palei. Ha kane ka jingjia iwei i la khlad noh hashen bad san ngut pat ki la ngat bad mynsaw lang ha katei ka jingjia.
Katkum ka jingtohkit ba lyngkot, la ong ba katei ka khynnah 14 snem ka la wanrah ia ka suloi ‘Pump-Action Shotgun’ sha skul, ha kaba ka la siat bad synreit kuli sha ki para khynnah ba iashong lang badka ha kajuh ka kamra klas.
Ha kaba kut jong kane ka jingjia, la ong ba katei ka khynnah ruh ka la duh lang noh ia la ka jong ka jingim bad kaba la kyntiew ia ka jingdon jong kiba khlad ha kane ka jingjia sha ka 2 ngut bad 5 ngut pat ki dei kiba la mynsaw bad kiba dang shah sumar ha ka hospital jong katei hi ka nongbah.
