San Francisco, Nohprah:
Ka tnat Alaska Airlines ha ka Sngi U Blei ka la pynbna ba kan thied ia ki liengsuiñ jong ka Hawaiian Airlines ha ka jingpynlut kumba $1.9 Billion na ka bynta ban pynïar ia ki kam ki jam jong ka tnat ha kine ki sngi ki ban wan.
La ong ba baroh ar tylli ki tnat kin sdang ban mih bad treikam lang katkum ka jingiakut bad ka por ba la buh lehse kumba 18 bnai bad yn dang hap ban iapynbeit bha haba iadei bad ka por ka jingiakut ban iatrei lang. Kine ki liengsuiñ kin leit ban her sha kylleng ki jaka kumba 138 tylli ki jaka ba kin hap ban leit her katkum ka jingdonkam bad ka jinghap jong ka kam.
Kumta, la ong ba dei ki nongshong shnong jong ka Hawaii ki ban ioh jingmyntoi bha na kane ka kam, khnang ba kin lah ban pynïar ia ki kam ki jam jongki sha United States.
Nalor nangta la ong ruh ba ki Kad Liengsuiñ jong kitei ar tylli kiba ju treikam ha la ki jong ki rukom kiba kynsai bad katkum ka rukom pyniaid jong ki.
Hynrei ia kane ka kam, yn hap ban da ioh ia ka jingmynjur na kiwei de ki ri bad ki tnat bapher khnang ba kine ki 2 tylli ki tnat kin lah ban iatrei lang. Namar kumba long ha ki por ba la leit, ka Sorkar u Biden ha u snem ba la leit, ka la khang ia ka jingiatrei lang jong ka American Airlines bad ka JetBlue Airways bad ka la pyrshang ruh ban khang ia ka JetBlue ban thied ia ki Spirit Airlines namar la ong ba kan ym pyn sngewtynnad ia ki paidbah nongleit- nongwan.
