Nongstoiñ, Nohprah 10
Ka kynhun ïalehkai jong ka 7 Wasa na Ri lum Jaiñtia kan sa ïakhun pyrshah ïa ka kynhun ïalehkai na ka nongbah Kolkata, ka Peerless Football Club ha ka 12 tarik u bnai Nohprah 2023 ha madan New Nongstoiñ hapoh ka sor Nongstoiñ.
Ka New Nongstoiñ Sports Social & Cultural Club (NNSSCC) ka la pyntip ba ka jingïakhun hapdeng ka 7 Wasa pyrshah ïa ka Peerless FC ha katei ka sngi ha ka lympung ïalehkai Invitation Knock Out Football Tournament 2023-24 kan sa long ha ka por 1 baje mynsngi.
Shuh shuh la ïoh jingtip ruh ba kum shibynta ban pynkhreh ïa ka jingïakhun pyrshah ïa ka 7 Wasa, ka Peerless FC na Kolkata ka la wan poi ha sor Nongstoiñ naduh ka janmiet jong ka 9 tarik mynta u bnai. Nalor nangta kane ka kynhun ka la ïoh ruh ban leit kilan met ha madan New Nongstoiñ shi bynta ban pynkhreh ïa katei ka jingïakhun.
Na ka liang ka NNSSCC, sa shisien pat ka khot ka wer ïa baroh ki paidbah ‘riew ieit phutbol jong ka thaiñ bad na kiwei pat ki jaka jong ka Jylla ba kin wan sakhi ïa katei ka jingïalehkai jong kitei ki ar tylli ki kynhun ha katei ka sngi, bad khlem pep ka jingïakhun hapdeng kitei ki ar tylli ki kynhun kan long kaba itynnad.
