Shillong, Nohprah 10
Ka Meghalaya ka la lah ban pynliem sa ïa ka Arunachal Pradesh kata da ka innings (pali) bad 76 run ha ka sngi kaba lai jong ka lympung ïalehkai U-19 Men’s Cooch Behar Trophy kaba la long ha Anand, Gujarat ha ka Sngi U Blei.
Haba bteng ban tied ïa ka pali ba ar ha ka sngi ba lai ba ki la dep ban ïoh lypa 22 run bad hap shi wiket ha ka sngi ba ar, bad ba ki donkam ban tied palat 183 run ban pynlong ïa ka Meghalaya ba kan hap ban tied biang, hynrei ki nongtied ka Arunachal kim shym la lah ban shan bad kamai tang 129 run na ki 45.5 over bad hap lut ki wiket, kaba la pynlong pat ïa ka Meghalaya ban khur ka jingjop kaba ar ha kane ka lympung.
Haba phai sha ka sngi kaba ar, ki nongtied ka Meghalaya ki la kamai haduh 365 run bad hap lut baroh ki wiket. Kane ka la pynlong ban tam lypa da 205 run ha ka pali ba nyngkong pyrshah ïa ka Arunachal kaba la tied 160 run bad hap lut ki wiket ha ka pali ba nyngkong. Ka jinglah ka Meg -halaya ban tied haduh palat 350 run ka la wan ruh lyngba ka jinglah ban ïalehkai bad tied bha jong u Avinash Rai uba la tied marwei haduh 126 run.
Katba na ka liang jong u Angkit Tamang u la lah ban ïalehkai bha ha ka ban kawang bol na bynta ban khur haduh 4 wiket bad ai 33 run na ki 17 over, katba u Shavian Blah pat u la khur 3 wiket bad ai 22 run na ki 11 over. U Kishlay Vishlux ruh u la khur 2 wiket bad ai 15 run na ki 4.5 over bad u Balgrik Sangma u la khur 1 wiket bad ai 32 run na ki 9 over.
U Shavian u la khur ruh 4 wiket bad ai 34 run ha ka pali kaba nyngkong, bad haba kheiñ lang, u la khur haduh 7 wiket bad ai 56 run ha baroh ar tylli ki pali bad ha kaba u la tied ruh haduh 74 run. Katba u Angkit bad u Balgrik ki la khur mar san wiket ha kane ka jingïalehkai, kata ha baroh ar tylli ki pali.
Hadien ka jingïakhaid bad ka Mizoram bad ka jingshah rem noh ha ka Nagaland, ki jingïalehkai kiba la long ha la ïing, mynta pat ka Meghalaya ka la khur ar tylli ki jingjop, kata ban jop ïa ka Sikkim bad Arunachal. Kane ka jingjop kan dei ruh kaba kham biang ïa ka Meghalaya namar ka Arunachal ka dei kaba la dep ban jop lypa ha baroh 3 tylli ki jingïalehkai kiba la dep bad kaba dang bat ïa ka kyrdan kaba nyngkong ha ka Plate Group.
Mynta pat ki rangïa-lehkai ka Meghalaya kin wan phai sha la ïing hapdeng ka jingdon jingkyrmen kaba khraw shwa ba kin mih madan pat ban ïakhun pyrshah ïa ka Manipur ha ka jingïaleh-kai kaba khatduh jong ka lympung, ka ban sdang naduh ka 15 tarik mynta u bnai.
