Kabul, Nohprah:
Ka Amnesty International ka la kyntu ia ka International Criminal Court (ICC) ba kan khmih bniah bad ban bishar ia ka hok jong kito ki lanot kiba shah ktah na ka jingwan jong ka sorkar Taliban hapoh Afghanistan naduh ba ka kynhun lehnoh Taliban ka la ioh knieh hi ia ka bor synshar hapoh Afghanistan ha u Nailar jong u snem 2021.
Ha katei ka jingthoh ba la phah da ka Amnesty International, la ong ba ka International Criminal Court (ICC) ka dei ban pyntikna ia ka jingbishar hok halor ki kam runar bad ki kam pynkheiñ aiñ ba la leh da ka kynhun lehnoh Taliban, kumjuh ruh da kiwei ki riewshimet hapoh Afghanistan naduh shuwa ba ka Taliban kan wan ha ka bor ha u snem 2021.
Haba iadei bad kane, la ong ba u Zaman Sultani uba long u nongwad bniah jong ka Amnesty International na South Asia, u la kyntu ia katei ka ïingbishar International Criminal Court (ICC) ba ka dei ban kham bishar bniah haba iadei bad ka jingpynkheiñ aiñ thma bad kiwei de ki jingpynkheiñ aiñ ba la leh da ka kynhun Taliban hapoh Afghanistan.
Kumjuh ruh na ka liang ka Taliban, ka la aibor ia ka International Criminal Court ba kan wad bniah halor kino- kino ki jingleh pynkheiñ aiñ jong kiwei ki ri hapoh Afghanistan.
Katkum ki jingtip ba la ioh lum da ki tnat wad bniah, ki dang don bun ngut ki kynthei kiba ïashim bynta ha ki jingiakhih paidbah ha ki por ba la leit bad kiba dang shah bat ha ki bor pyniaid ka Taliban haduh kane ka kynti, kynthup ia ka Julia Parsi, Manijeh Sediqi, Neda Parwani bad ka Parisa Azada.
