Shillong, Nohprah 10
Ka Shillong Lajong Football Club ka la mad ïa ka jingshah rem kaba nyngkong eh ha ka lympung I-League 2023-24 hadien ba ka la shah pynliem noh ha ka Aizawl Football Club da 3-0 kol ha ka jingïalehkai kaba la long ha ka Sngi U Blei ha madan SSA Stadium, ha Polo Shillong.
Lah ban pynkynmaw ba shwa jong kane ka jingïalehkai, ka Shillong Lajong na ki phra tylli ki jingïalehkai ba ka la ïakhun, ka la jop saw sien bad ban ïakhaid ruh saw sien. Kumta kane ka nam rem kan dei kaba nyngkong na ka bynta ka Shillong Lajong.
Haba phai sha ka jing-ïalehkai ha kane ka sngi, la ïoh ban sakhi ba ka Aizawl FC naduh kaba sdang ka la ïalehkai bha bad buh jingeh shi katdei ïa ki rangïalehkai ka Shillong Lajong khamtam ïa ki rangïalehkai dien. Kumta dei tang ha ka minit kaba 4, u Lalrinzuala u la ïoh ban khyrwit ïa ka kol kaba nyngkong bad katba ka jingïalehkai ka dang ïaid, ha ka minit kaba 17 ka Aizawl ka la ïoh khyrwit sa ka kol kaba ar ba la thep da u R Ramdinthara bad kane ka kol ka la pynsngap jar ïa ki nongkyrshan ka Lajong kiba la wan ai jingkyrshan da ki hajar ngut.
Watla ka Shillong La-jong ka la ïoh katto katne ki kabu, hynrei na ka liang u rangïalehkai shakhmat u Karim um shym la lah ban pynurlong ïa kine ki kabu sha ki kol bad haduh ba kut ka kylla step ka Aizawl ka la tam lypa da 2-0 kol.
Haba bteng ïa ka kylla miet ruh, ki rangïalehkai ka Aizawl ki la sdang ha kajuh ka rukom bad dei ha ka minit kaba 57 ba ka la ïoh syndon ïa ka kol kaba lai ïa kaba la thep da u Zoherliana. Kane ka kol ka la pynduh mynsiem shi katdei eh ïa ki rangïalehkai ka Shillong Lajong naba watla ki la pyrshang kat lah kat ïai hynrei kim shym la lah ban pynkhih jar shuh.
Lyngba kane ka jing-jop, ka Aizawl ka la kiew sha ka kyrdan kaba ar kata hadien ba ka la kamai 17 point na ki 9 tylli ki jing-ïalehkai, katba ka Shillong Lajong ka la hiar sha ka kyrdan kaba 4 na ki 16 point ba ka la ïoh na ki 9 tylli ki jingïalehkai.
Hadien kane ka jingshah rem, mynta pat ka Shillong Lajong kan pyn-khreh ban ïakhun shabar na la ïing, kata ban ïakhun pyrshah ïa ka Real Kashmir ka ban long ha ka 16 tarik Nohprah katba ha kane kajuh ka sngi pat, ka Aizawl kan ïakhun pyrshah ïa ka Kerela Gokulam ha la ïing.
Kumta kaba sah mynta ka long ba ka Shillong Lajong kan hap ban ïakhun tyngeh shabar na la ïing ban khur ïa ki jingjop, ban kiew sha ka kyrdan ba shajrong ha ka miej ïakheiñ point bad ban kyrmen ba kiwei pat ki kynhun kiba don shajrong jong ka, kin mad nam rem ha ki jingïalehkai ki ban wan.
