New Delhi, Nohprah:
Kumba la sakhi, la ong ba ka nongbah Delhi, ka la nangkiew da 5 per cent ha kaba ïadei bad ki kam beaiñ kiba long pyrshah ïa ki khynnah ha kaba ki la don palat 1,500 tylli ki jingjia ïa kiba la dep ban buh jingthoh ha baroh shi snem jong u 2022 hapoh ka jingtreikam jong ka Protection of Children na ka Sexual Offences Act.
Kumba la ïohlum jingkheiñ bad phah jingtip da ka National Crime Records Bureau, u snem 2022 u la paw ba ki la don kumba 7,468 tylli ki jingjia jong ki kam thombor kiba long pyrshah ïa ki khynnah. Ha u snem 2021, ka jingdon jong kum kine ki jingjia, ka la long 7,118 katba ha ka por ba wan ka khlam COVID ha u snem 2020, ki la don kumba 5,368 tylli.
Ka jingïohlum jingkheiñ ka la pynpaw ba ki la don kumba 899 tylli ki jingjia, kynthup ki 2 tylli ki jingjia ba la jia ïa ki khynnah shynrang kiba dang rit, ïa kiba la buh jingmudui bad pynngat hapoh ka kyndon 4 bad 6 jong ka POCSO Act. Ka jingpynshitom sha ki nongleh bymman pyrshah ïa ki khynnah ka long katkum ki kyndon, don kiba shah pynngat ha ka kyndon 4, 6, 8 bad 10 jong ka POCSO.
Ki la don kumba 533 tylli ki jingjia ba la ïoh ban buh jingthoh kynthup ki kam beaiñ kiba long pyrshah ïa ki khynnah shynrang. Ki la don baroh kumba 63 tylli ki jingjia ïa kiba la shah pynngat hapoh ka POCSO Act hapoh ka kyndon 377. Ka jingdon jong ki kam beaiñ ka dei kaba long pyrshah ïa 56 ngut ki khynnah shynrang bad 7 ki khynnah kynthei kiba dang rit. Ha kaba ïadei bad kine ki jingjia, ki pulit ki la ïoh ban buh ka jingpynrem da 216 tylli. Ki la don kumba 22 ngut ki khynnah ïa kiba la shah pynïap.
