Washington, Nohprah:
U President ka United States Joe Biden ha ka jingiakren phone bad u Myntri Rangbahduh ka Israel Benjamin Netanyahu ha ka Sngi Palei, u la ong ba ka jinglong-jingman hapoh Gaza ha kane ka kynti ka la sniew haduh katta bad kumta ka Israel ka dei ban pyrkhat na ka bynta ki paidbah nongshong shnong ka Gaza bad ban pynduna ruh ia ka jingther bom ne jingther ‘namding sha kito ki jaka ba don ki riew paidbah.
Kumta, u Biden u la iathuh ba u la dep ban iakren bad kyntu ruh ia ka Israel ba ka dei ban ialeh kumno ban iada ia ki paidbah ba lui-lui bad kumjuh ruh ban ialeh kumno ban pynkynriah noh shuwa ia kitei ki paidbah sha ki jaka ba kham shngaiñ da kaba ailad ia ki paidbah bad ki bor pyniaid ka Gaza ba kin phah kynriah noh ia ki paidbah nongshong shnong sha kiwei pat ki jaka ki ban lait na ka jingma jong ka thma.
