Imphal, Nohprah:
Ka jingpang African Swine Fever (ASF) kaba dei kawei na ki jingpang kaba ju ktah ïa ki sniang bad wanrah jingduhnong halor ka jingïap jong ki sniang, la lap ba ka la sdang ban ktah biang ha Imphal West distrik.
Kumba la khmih bniah, la ong ba ki bor ba dei khmih ki la shem ba kane ka jingpang ka la sdang ban saphriang bad ktah biang ïa ki sniang ha kiba bun ki shnong kiba hap hapoh ka Imphal West District.
U Dr. Johnson Meetei, Additional Deputy Commissioner, Imphal West distrik, u la hukum ba la dei ban don ka jingshim ïa ki sienjam khnang ban lah ban pynshisha halor ka jingsdang biang jong ka jingpang ASF ha ka distrik.
Ïa ka jingpang la shem ba ka la sdang ban ktah ha ki jaka ri sniang jong ka Farm of Akham James Singh, Kangmong Meisnam Leikai kaba don ha ka distrik. Ha ka jingthoh ba la phah naduh ka sngi Balang, u Dr. J Meetei u la pynthikna halor ka jingshah ktah jong ki jaka ri sniang ha ki thaiñ kiba marjan bad ki Farm ri sniang kum ki thaiñ ba shah ktah ha ka jingpang.
Haba la lap ïa kane ka jingshisha la khang ha ka ban kit, ban die ïa ki sniang la ki long kiba ïap ne kiba im ha kine ki thaiñ ba la shah pyrkhing.
