Jowai, Nohprah 10
Ka Kur Sookpoh Khad-Ar Wyrnai Development Society, Jowai ha ka 9 tarik Nohprah ka la pynlong ïa ka dorbah bah kaba long ha Ïing dorbar ka Kur ha Chilliangraij, Jowai.
Ha katei ka sngi, ka Kur Sookpoh Khad-Ar Wyrnai ka la pynkup burom ïa ki rangbah bad longkmie bad kiba wan shongkha ha ka kur, ki khun bad ki paralok parajor kiba synñiang sha ki kam ba bha jong ka kur.
Kine kiba shah pynkup burom ki kynthup ïa u Ma Ohiwan Lamar, ka Kong Emhok Lamar, u Ma Joinpil Pde, ka Kong Phrina Shylla, u Ma Oriland Shylla, ka Kong Aloma Passah bad u Ma B. Richard Uriah.
Ka Kur Sookpoh Khad-Ar Wyrnai ka la pynkup burom ruh ïa ki samla pule kiba la pyndep ïa ka matrik bad kiba ‘pass’ bha kiba kynthup ïa ka Hazelbelle Ivilianca Pasweth, Hakayooki Lytan, u Renny Nathan Siangbud. Ha ka klas XII- ka Susanna Bescy Siangbud, u Wansame Pakynteiñ.
Ha ka Bachelor Degree ki long ka Daïa Lanong, ka Sakhiwanka Kynjing, Idalana Ika Lytan, u Armanki Nikhla, Hauru Pakyntein, ka Lapkibai Lakiang, ka Vailan Kanni Lakiang. Ha ka Master Degree- ka Primadona Paswet, ka Veralana V. Syngkon bad ka Samhaka Lakiang.
Ha ka kyrdan PhD, la pynkup burom ïa ka Dr. Mebalarisha Paswet.
Ka Kur Sookpoh Khad-Ar Wyrnai ka la wan shakhmat ban ithuh bad pynkup burom ruh ïa ki ‘rang pyni dohksah kiba jop ha ka jingïakob pyni dohksah ha ki rynsan bapher-bapher. Kine ki kynthup ïa ka Sawakani Lakiang, kaba la jop ïa ka ‘Bikini Model’ ha ka ‘Mr. and Ms. East India 2023’, ‘Zonal Bodybuilding & Models Championship’ kaba long ha Ranchi, Jharkhand ha u bnai Risaw, 2023.
U B. Desire Kynjing uba wan ha ka kyrdan banyngkong ha ka ‘Men’s Bermuda Beach Model’ jong ka ‘Mr & Ms Meghalaya Body Building Competition’ kaba long ha Soso Tham Auditorium ha sor Shillong ha ka 4 tarik Risaw, 2023 bad uwet pat u dei u Luckyman Kynjing uba wan ha ka kyrdan banyngkong ha ka ‘Denim Jeans Model’ (Short) ha ka ‘Mr. and Ms. East India 2022’, ‘Zonal Championship’ ha ka 6 tarik Naiwieng, 2022.
La pynkup burom ruh ïa ki rangbah ka Kur kiba la kynjoh sha ka rta kaba 75 snem.
Ha kane ka sngi la ïadonlang u President ka Kur Sookpoh Khad-Ar Wyrnai, u Ma Puramon Kynjing uba long ruh u Dolloi ka Elaka Jowai, General Secretary ka Kur Ma Marryngkat Syngkon, Kong Hima Lakiang, Chairperson WWO nalor kiwe-kiwei.
La pynphuh pynphieng ïa kane ka Dorbar da ka jingrwai jingshad ba la ïashim bynta ki khun ka kur na Dulong bad Ummulong Unit.
Ha katei ka sngi la ïoh ruh ka jingkren na ka Kong Kawan Kynjing, Advocate halor ka mynsiem maya kur ki rangbah, ka jingkren na u President, Ma Puramon Kynjing bad kiwei-kiwei.
