Khliehriat, Nohprah 10
Ka Sutnga SSCC ka la rung sha ka final jong ka lympung ïalehkai Super Division Football Tournament ba la pynïaid da ka East Jaiñtia Hills District Football Association ha madan Artificial Turf Diengshynrum, Khliehriat.
Kane ka la wan hadien ba ka Sutnga SSCC ka la lah ban pynliem noh ïa ka Rymbai Shkenshynriah Sports Club da 2-1 kol ha ka jingïakhun semi final kaba nyngkong kaba la long ha ka sngi Saitjaiñ.
Ïa ki kol jong ka Sutnga SSCC la thep da u Ioanis Suchen ha ka minit kaba 53 bad u Ram Bareh ha ka minit kaba 90+2, katba ïa ka shi kol jong ka Rymbai Shkenshyriah la thep da u Ribhame Dkhar ha ka minit kaba 43.
Ha ka jingïakhun semi final kaba ar (Eliminator) ka Rymbai Iawpynsing ka la pynliem noh ïa ka Khliehriat West YWSC da 2-1 kol.
Ïa ki kol jong ka Rymbai Iawpynsing la thep da u Phirip Lyngdoh ha ka minit kaba 56 bad u Rimiki Rymbai ha ka minit kaba 67, katba ïa ka shi kol jong ka Khliehriat West YWSC la thep da u Raplangki Lyngdoh ha ka minit kaba 82.
Ka jingïakhun Qualifier kaba ar kan long ha ka 12/12/2023 ha ka por 1 baje mynsngi hapdeng ka Rymbai Skhenshynriah Sports Club pyrshah ïa ka Rymbai Iawpynsing Sports Club.
Ka kynhun kaba jop ha kane Qualifier kaba ar kan aireng pyrshah pat ïa ka Sutnga SCC ha ka jingïakhun final ka ban long ha ka 15/12/2023 ha ka por 1 baje mynsngi.
