Shillong, Nohprah 11
Ka Shillong Sports Association (SSA) kan pynlong ïa ka lympung ïalehkai na ka bynta ki khynnah kaba la tip kum ka U-16 Football Tournament 2023-24 ha ka taïew ba-ar u Rymphang jong u snem thymmai.
Kane la wan hadien ba ka Tournament Committee jong kane ka synjuk ka la shong jingïalang ha ka 2 tarik mynta u bnai. Kane ka long shi bynta ban plie lad ïa ki khynnah ba kin pyni ïa ki sap ïalehkai ba kyrpang hashwa ban kin jam sha kiwei pat ki kyrdan ïalehkai.
Ha kaba ïadei bad kane ka lympung, ka synjuk ka la pynbeit ba kan pynlong ïa ka jingjurip rta na ka bynta ki rangïalehkai ka ban long ha ka 15 tarik mynta u bnai. Kawei pa kawei ka kynhun ka lah ban pynrung haduh 25 ngut ki rangïalehkai ha kaba kin hap ban phah sha katei ka jingjurip rta bad ka jingpynrung khynnah kaba khatduh eh (final registration) ka long sa tang 20 ngut ki ban pyndep ïa ka jingshah eksamin.
Ka bai pynrung kyrteng na ka bynta uwei u rangïalehkai kan long T.20 tyngka bad kane kan dei tang kito kiba la lah ban pyndep ïa ka jingshah eksamin ha katei ka synjuk.
Katei ka synjuk ka la bthah ruh ba kino kino ki klob ki dei ban don 16 ngut ki rangïalehkai ki ban lah ban pyndep ïa ka jingshah eksamin bad kiba duna nangta kim lah ban ïashim bynta ha katei ka lympung.
Ha katei ka por ba ki wan sha ka jingshah jurip rta ka ban sdang naduh ka por 10 baje mynstep, ki khynnah ki dei ban wanrah lang ïa ki kot ki sla ki ban pynshisha ïa ka snem kha (Original and Xerox copy) ryng-kat ka Aadhaar Card.
