Shillong, Nohprah 11
Lai ngut ki nongkiewlum ka Jylla kiba don hapoh ka synjuk jong ka Meghalaya Sport Climbing & Mountaineering Association (MeSCMA) ki la khur takma ha ka North East Zonal Sport Climbing Championship 2023 kaba la kut ha ka Lah Sngi U Blei ha IHCAE, Chemchey, Sikkim.
Ïa kane ka prokram la sdang naduh 8 tarik mynta u bnai ha kaba la wan ïashim bynta lang da ki nongkiew lum na kylleng jong ka thaiñ shatei lammihngi.
Ïa ka takma ksiar ha ka Sub Junior Girls la khur da ka Dadapbiang Lyngdoh ha ka Lead Climbing, katba ïa ka takma rupa la khur da ka Valarie Suchiang ha ka Lead Climbing jong ka Women Open Category, katba ïa ka takma rnong la khur da u Bhabok Nongkhlaw ha ka Bouldering jong ka Sub Junior Boys.
Ha ka Men Open Category u Ricky Rani u la wan ha ka kyrdan ba khadar bad ïa ka kyrdan ba khadsaw la khur da u Balawan Habor Rynjah. Ha ka Sub Junior Girls ka Pynkmenlang Lyngdoh ka la wan ha ka kyrdan ba hynriew bad ïa ka kyrdan ba khadar la khur da u Ibadarisuk Kynjai Sohshang.
Ha ka Sub Junior Boys, u Given-samson Lyngdoh u la wan ha ka kyrdan basan bad ïa ka kyrdan ba khyndai la khur da u Mebandonlang Umsong. Ha ka Junior Boys, Leadingstar Kharbudon u la wan ha ka kyrdan ba saw, u Kyrmenskhem Lyngdoh u la wan ba khadwei, ba khadsaw la khur da u Teibanbha Rani, katba u Shaiphar Nongkhlaw u la shah weng noh noh na kane ka jingiakop na ka daw ka jingbakla.
Kat kum ka kyrwoh ba la pyllait da katei ka tynjuk, la ong ba kitei ki nongjop kin ïoh ban mihkhmat shaka 27th National Sport Climbing Championship ka ban long ha Bangalore naduh 21 haduh 24 tarik mynta u bnai.
