Shillong, Nohprah 11
U Myntri ba dei khmih ïa ki kam ïalehkai jong ka Sorkar Pdeng u Anurag Singh Thakur u la plie ïa ka Khelo India Para Games kaba nyngkong ha ka Lah Sngi U Blei ha KD Jadhav Indoor Hall at Indira Gandhi Sports Complex kaba ha nongbah Delhi.
Kane ka lympung ïalehkai ka la sdang naduh 10 tarik ba la pynlong ha ki lai tylli ki jaka ha nongbah Delhi bad yn pynkut ha ka 17 tarik.
Ha kane ka lympung la wan ïashim bynta da palat 1400 ngit ki nongïa-lehkai (para-athletes) na ki 32 tylli ki jylla bad Union Territories, ki ban ïashim bynta ha ki hyn-ñiew tylli ki jingïalehkai. Ha kane ka sngi sdang la lah ban pynlong ïa ki jingïalehkai kiba kynthup ïa ka athletics, shooting, archery, football, badminton bad table tennis.
Ki nongïalehkai kiba paw ki ban ïashim bynta ha kane ka lympung ki long ka Sheetal Devi, Bhavina Patel bad u Pramod Bhagat nalor kiwei pat. Ha kane ka sngi plie, ki nongtem jong ka Delhi Police ki la tem ïa ki jingtem jong ki ha kaba la ïoh ruh ïa ki jingshad ba la ai kyrteng ‘We Are One’ kaba dei ka kynhun kaba la ïashim bynta ha ka ‘Mitti Mein Mil Jawa’ bad ‘Vande Mataram.’
Kumba ka paw ki nongïalehkai para lympic ki la lah ban pynpaw ïa ka jingtbit na ka bynta ban wanrah burom ïa ka ri ha ka Tokyo Paralympics kaba la lah da kaba ki la lah ban khur 19 tylli ki takma. Kine ki kynthup ïa 5 tylli ki takma ksiar, 8 ki takma rupa bad 6 ki takma rnong.
Te kumta la khmih lynti ba kin dangmih shuh shuh ki nongïalehkai ki ban pynpaw ïa ka sap ïalehkai ha Khelo India Para Games khnang ban ki nangjam shaphrang ha ki kam ïalehkai jong ki.
