Saipung, Nohprah 11
Ka Krem-Myrsiang FC ka la long ka lahduh jong ka aïom ïalehkai Second Division Football Tournament, hadien ba ka la lah ban pynliem noh ïa ka Ever Young da 1-0 kol ha ka jingïakhun final kaba la long ha madan Lamyrsiang ha ka lah sngi U Blei.
Ïa kane ka lympung ïalehkai Second Division la pynïaid da ka Saipung Block Sports Association (SBSA). Kane ka shi kol dei kaba la thep da u Josly Chyrmang ha ka extra-time kata ha ka minit kaba 115.
Haba phai sha ka jingïalehkai ka la long kaba ïathaiñ bha ha baroh arliang mamla, bad ka kylla step bad kylla miet ka la kut khlem da lah ban pynkhih ïa ka jar kol, bad dei hadien ba la rah ïa ka jingïalehkai sha ka extra time ha kaba ka Krem Myrsiang ka la ïoh ban thep kol bad khur syndon ïa ka nam lahduh.
Ïa ka khusnam da ka song pisa kaba T. 10 hajar tyngka bad T. 7000 tyngka ryngkat ka trophy sha ka lahduh bad ka sha ka kynhun kaba wan ba ar la sam da u kongsan u Bah Aron Bamon uwei na ki riew pawkhmat ka thaiñ ha ka jingdonlang u President ka SBSA u Bah Victor Suja, u Bah Rimi Shadap, General Secretary bad kiwei kiwei ki dkhot ka SBSA.
Ïa ka khusnam ‘Player of the match’ la ïohrah da u Nikison Chyrmang, ïa ka ‘Best Goalkeeper’ la ïoh da u Akash Lamurong baroh ar ngut kidei na ka kynhun Krem Myrsiang bad khusnam ‘Player of the tournament’ la ïoh rah da u Damehitre War na ka Ever Young FC.
