Shillong, Nohprah 11
Ka hat-trick ba la khur da u Mebanrikupar Rynjah ka la biang pura ïa ka Laitkyrhong SC ban khur ïa ka jingjop ha ka lympung ïalehkai 2nd Division Football League 2023 ba la pynïaid da ka Shillong Sports Association, hadien ba ka la lah ban pynjemkhnap ïa ka Imson SC haduh 6-2 kol ha ka Lah Sngi U Blei ha SSA Stadium, Polo.
Tang mar ïasdang ka jingïalehkai ka Imson ka la pynkhih jar nyngkong eh lyngba u Wanborlang Nonstanber ha ka minit kaba 6. Hynrei hadien katto katne por ka Laitkyrhong ka la pynphai kylla ar kol lyngba u Mebanrikupar Rynjah ha ka minit kaba 22 & 29. Hadien shiteng kynta une rangïalehkai shakhmat u la khur syndon ïa ka hat-trick hadien ba u la ïoh ban thep biang sa shi kol ha ka minit kaba 35.
Ka Laitkyrhong ka la ïoh ban thep ia ka kol kaba saw lyngba u Synsharborlang Kurkalang ha ka minit kaba 58. Hadien shi kynta ka Imson ka la thep biang sa shi kol lyngba u Micheal Kshiar ha ka minit kaba 62.
Hashwa ban wai ka Laitkyrhong ka la ïoh ban thep biang sa ar kol lyngba u Samboklang Kurkalang ha ka minit kaba 68 bad bad kawei pat da u Secondlystar Mylliem ha ka minit ba 75 na ka bynta ban khur syndon ïa ka jingjop.
Haba phai sha kawei pat ka jingïakhun kaba ar, ka Sohiong ka la pynliem noh ïa ka Sohryngkham SC da 2-1 kol.
Ha kane ka jingïakhun ka Sohïong ka la thep kol nyngkong lyngba u Arbunsing Warjri ha ka mint kaba 7 & 31, katba ka Sohryngkham ka la lah ban pynphai kylla shi lyngba u Pynshongdor Pyngrope (85) hashwa ba kan mad ïa ka jingshah rem.
Ka jingïalehkai ha ka sngi Ba-ar kan long hapdeng ka Smit SC pyrshah ïa ka Umphrup SC ha ka por 11:30 mynstep, katba ka Marbisu SC ïa ka Laitlyngkot SC ha ka por 2:15 janmiet.
