Shillong, Nohprah 12
Ka Executive Committee ka Khasi Hills Autonomous District Council kan wanrah biang ïa ka Clan Bill lane ka aiñrew halor ka kur ka jait bad ïa kane ka aiñ la pynshong nongrim katkum ka thymmei u Khasi, kata, ka longkur longkha.
Ïa kane la ïathuh da u Chief Executive Member ka KHADC ha ka Sngi Ba-ar haba kren ha ka jingïalang ha phyllaw Ïingsad ka Hima Khyrim.
Haba kren shaphang ka jingdon da ki hajar tylli ki kur, u Bah Pynïaid u la ong ba ka Clan Bill ka dei kaba la pynwandur halor ka thymmei u Khasi kata ka longkur longkha, ha kaba kin don ki seng kur ki ban peit ban khmih ïa ka bit ka biang ki para kur.
U la ong ba lada ki don ki seng kur bad lyngba ka jingtreikam kaba khlaiñ jong ki seng kur, ka kur ka jait kan don ka jingkitkhlieh ïa la ki kur ki jait bad haba ka khlaiñ ka jingtreikam yn nym don ruh u Khasi u ban khrong namar ka kur ka jait kan don ka jingsngewrem ban ïohi lada don mano-mano napdeng ka kur ka jait ki mad jingeh bad poi sha u pud ban hap khrong.
Kumta u la ong ba ka Executive Committee kan shong ïatai haba ïadei bad kane ka aiñrew bad ynda la lah ban pynbit pynbiang yn wanrah ha ïingdorbar ban ïoh ka jingmynjur bad hadien kata yn sa phah sha u Lat ka Jylla ba un ai ka jingmynjur khnang ba kan long ka aiñ kaba pura.
Kham mynshwa ka KHADC ka la bynshet ha ka Advisory Committee on Law and Traditional Affairs ban khmih bniah bad pynbit pynbiang ïa ka aiñrew lane ka bill. Ïa kane ka aiñrew la tip kum ka “KHAD (Khasi Social Custom of Clan Administration) Bill.
Kane ka aiñrew ka kren ruh shaphang ka rukom shim jait ki Khasi ha kaba la pynskhem ban shim jait beit tang na ka kmie, ym na u kpa.
U Chairman kane ka Advisory Committee on Law and Traditional Affairs dei u Symbud Myntri Rangbah barim ka Jylla uba dei ruh u MDC, Bah Bindo M Lanong nalor kiwei pat ki riewshemphang kum ki dkhot.
