Moscow, Nohprah:
Ka iing dorbar thaw aiñ jong ka Russia, ha ka Sngi Palei ka la ioh ia ka jingmynjur ban pynlong ia ka ilekshon ban jied President thymmai ha ka 17 tarik jong u Lber, 2024.
Ia kane ka rai la shim hadien ba la ioh ia 162 tylli ki jingkyrshan na ka Federation Council haba iadei bad katei ka kam.
Da kane, la ong ba ki nongialam jong ki seng bapher bapher shen kin sa sdang ban pynlong noh ia ki jingialang paidbah bad ki jingïalap ilekshon ha kylleng ki bynta ban pynsngewthuh ia ki paidbah bad ban pan jingmut ruh na ki paidbah haba iadei bad ka mon sngewbha jongki.
La ong ruh ba ha ka sien ba nyngkong eh, ki nongshong shnong jong kito ki thaiñ ka Donetsk, Luhansk, Zaporizhzhya bad ka Kherson kiba long jong ka Ukraine baroh shi katta, ha kane ka por pat kin ioh ban ïashim bynta ha ka jingthep vote ban jied ia ki nong-ialam jongki na Russia mynta ba ki la long hi ki nongshong shnong jong ka Russia naduh ba ka Russia ka la pyniasoh ia kitei ki 4 bynta jong ka Ukraine sha lade.
Da kaba ïashim bynta lang hajuh ban jied ia u nongialam ne ki nongialam jong ka ri, kan wanrah ia ka jinglong kawei ba baroh ki ïadon ha kajuh ka ri bad hapoh ka jingkdup bad jingkhmih jong ka sorkar Russia watla ki dang long ki nongshong shnong ba thymmai jong ka Russia ha une u snem.
Katba, na ka liang u President ba mynta jong ka Russia, u Vladimir Putin um pat shym la kren eiei halor katei ka ilekshon ka ban long hapoh ka ri, la un ïashim bynta biang ban iakhun naka bynta katei ka shuki ne un shong thait noh ruh.
