Hadien katto-katne bnai ba u sohtrun na East Garo Hills u la poi sha Abu Dhabi, mynta pat ka la dei ka kynti jong u sohniamtra Khasi lane Khasi Mandarin ban ïoh jaka ha Dubai. Kine baroh ar ki dei ki jaka bapawkhmat ha Middle East bad ki long ki bariewspah haduh katta-katta nalor ba ki dei ki jaka pdeng ba khring bha ïa ki nongleit nongwan na kylleng ka pyrthei. Ngi dei ban ai jingïaroh nyngkong eh ïa ki nongrep jong ngi kiba trei shitom ban pynthikna ba ki soh ki pai kin mih kyrhai ha ki kper bad ki bri jong ki. Hadien kata, hap ruh ban ïaroh ïa ka sorkar Meghalaya kaba la ïatreilang bad ki nongrep bad sa kiwei pat ki kynhun ban pynpoi ïa kine ki mar rep nangne sha kitei ki jaka ki bapawnam. Hashwa jong kine ki soh ki pai, u shynrai na Lakadong u la poi sha ki katto-katne ki nongbah jong ki Ri ba kham paw. Lehse kan poi ka por ba ngin ym sngewlong nongwei shuh haba ngi leit sha kiwei pat ki Ri namar ngin ïohi bad ïoh bam ïa ki soh ki pai, jhur ki jhep, shynrai, bad kiwei ki mar rep kiba pynmih na kane ka jylla. Ngi kyrmen ba kan long kumta khnang ba kan long ka jingmyntoi khamtam eh ïa kito kiba don bynta ha ka rep ka riang.
Ka long shisha ka jingsngew sarong bad ka jingkmen haba ïohi ïa kiba kum kine ki jingurlong. Ka pyrthei ka dei ban tip ïa ka jingriewspah jong ka jylla Meghalaya ha ka liang ki mar-rep bad kiwei pat ki jingpynmih. Lada lah ban pynbun ïa ka ïew ka hat shabar ri, ngi ngeit ba wat ki nongrep jong ngi ruh kin ïoh jingmyntoi. Lada ki ïoh jingmyntoi kaba heh, kin nang ïoh mynsiem ban pynbha bad pynïar shuh ïa ka rep ka riang la ki dei ki soh ki pai ne kiwei pat ki jingthung. Haba ym don ïew don hat, khlem pep kin duh mynsiem noh ban trei ha ka rukom kaba dei. Suki-pa-suki, ka ïew na ka bynta ki mar rep na Meghalaya ka la nang ïar. Ka la dei ka por ban nang pynbun ïa ki ïew ki hat ha kylleng sawdong ka pyrthei – New York, Paris, Moscow, London, Melbourne, Sydney, bad kumta ter-ter. Kat nang bun, katta nang bha bad katta nang ïoh mynsiem ki nongrep jong ngi.
Watla ngim dei ki nongrep, ngi sngewthuh ba shisien ba ka ïew ka hat kam don, kam myntoi ban ïa pynmih umsyep ha ki lyngkha bad ki bri. Kan bha ban wad noh da kiwei ki kam ki jam ki ban kham lah ban wanrah ïa ka bam ka sa ha ïing ha sem. Ka la don ka khep ba namar ka jingwan ka skhim bylla 100 sngi lane ka skhim ‘Job Card’, ka rep ka riang ka la hiar na ka daw ba kito kiba ju rep ki ïohi ba ka jingïoh ka kham bun lada leit bylla 100 sngi. Ka la don ruh ka jingpynkylla pung dohkha ïa ki pynthor ki hali namar ki nongrep ki sngew ba kham ïohnong ban ri da ka dohkha ban ïa kaba pynmih ïa ki mar rep. Lada baroh ki nongrep ki ïa ïaid ha kata ka lynti, shaei ka rep ka riang ha kane ka jylla kan poi? Bad mano napdeng ki nongrep kiba kwah ban ïaid sah ha ka jingduhnong? Baroh ngi angnud ïa ka jingim kaba bha bad kaba lah ban wanrah kham bun ka kamai. Kam dei satia ka pop ban angnud kumta, bad ka dei ruh ka hok jong baroh ki nongshong shnong ban don ïa kata ka jingmut kaba khlaiñ.
Ka jingkyntu sha ka sorkar ka long ba nalor ka jingkhaïi ïa ki mar rep na kane ka jylla shabar ri, donkam ban pynkhlaiñ bad pynbha ïa ki ïew ki hat kiba don ha la ka jong ka rympei da kaba pynthikna ba ki nongrep kin ym shah khñiot than ha ki heh saipan ha kaba ïadei bad ka dor ka mur. Ha kajuh ka por, dei ruh ban peit sha ki ïew ki hat kiba don ha ka Ri lajong namar ka India ka dei ka Ri ba bun paid. Ha India bad shabar ruh kumjuh, ki paidbah ki ïa beh ban ïoh ïa kita ki jingbam bad mar rep kiba khlem khleh dawai lane ki jingbam ‘Organic’ ba la pynmih bad pynheh pynsan da ka sboh ka bym don jingktah ïa ka jingkoit jingkhiah. Kine ki jait marbam ki long kiba remdor. Lada ngi lah shisha ban kyrshan ïa ki nongrep ban pynmih ïa ki marbam ki bym don dawai ba ktah ïa ka koit ka khiah, hangta ka jingkamai ka jong ki kan nang bun, bad kiwei ki bym pat don bynta ha ka rep ka riang ruh kin ïoh mynsiem ban sdang noh ka jingpynmih ïa ki jhur ki jhep, soh ki pai bad kiwei ki marbam.
Sha ki nongrep, ka jingkyntu ka long ba kin nang ïai trei shitom bad ban hikai lem ïa ki khun ki kti jong ki ban nang ban rep ban riang. Kam dei ban kut noh tang ha ka shi pateng. Ka dei ban bteng pateng la pateng khnang ban im ka rep ka riang. Ka jingdkoh ha kane ka jylla ka long ba kiba bun ki kam ki kut noh tang ha ka shi pateng bynriew bad kam ju don ka jingbteng kaba ïaineh. Kane ka rukom leh ka dei ban duh noh bad ki pateng ba mynta kim dei ban lehraiñ ban long ki nongrep. Ki dei ban sngewsarong pynban ba ki long ki nongpyndap marbam ha ki ïing ki sem kiba bun. Ka jingkylla ka dei ban sdang shwa ha ka jingmut jingpyrkhat bad nangta kan sa bud ryngkhi ha kiwei pat ki bynta.
