Imphal, Nohprah:
Ka kynhun jong ki shipai ïada ri ka la ïoh ban kurup ïa kiba bun ki tiar siat bad ki kuli ïasiat, kynthup ki bom kawang kti, bad kiwei pat ki tiar siat kiba kham pher ha ka shnong Salam Patong kaba don ha Thoubal distrik jong ka Manipur, la ïathuh ki shipai ka tnat Assam Rifles ha ka 11 tarik, Nohprah. Kumba la ïathuh ka tnat Assam Rifles, la ong ba uwei u CMG, saw tylli ki bom kawang kti, saw tylli ki bom kawang kti ba la shna ha China, mar kawei ka Stun bad Tear Grenade, kawei ka pistol 09 mm , kawei ka pistol shna hi, hynriew tylli pistol, hynirew tylli ki Shotgun shell, uwei u bom ïa u bym shym la pynbthei bad kawei ka Launching Tube jong ka SLR ha Thoubal distrik jong ka Manipur ha ka 9 tarik, Nohprah la ïoh ban kurup. Ha basdang jong une u bnai, kata ha ka 9 tarik, Nailur, ki pulit ki la ïoh ban pyllait im ïa uwei u khynnah uba la shah rahbor jong ka DM College of Science ha Imphal bad ïoh ban kem ruh ïa 8 ngut kiba la shah kynnoh ba ki dei ki nongrah bor ha ryngkat ki tiar ïasiat bad ki tiar pynbthei ha ka por ba ka la don ka jingpyntreikam ha ka shnong Yumnam Huidrom, la ïathuh ki pulit jong ka Wangoi kaba don ha Imphal West district, la ïathuh ki pulit. Une u khynnah u dei uba la shah rahbor na New Boy’s Hostel jong ka DM College ha ka por ba dang shit dang shai jong ka sngi Thohdieng, ka 8 tarik, Nohprah. Ym slem hadien ba la ïoh jintip shaphang ka jingshah rahbor, ki pulit ki la her bran bran sha katei ka jaka na ka bynta ban leh ïa kaba donkam bad ban pynlong ïa ka jingleit khynra sha kylleng ki jaka kiba don hapoh ka distrik khnang ban lap ïa une u khynnah pule bad ban ïoh ban pyllait im ïa u, la ong u SP jong ka Imphal West, u Shivakanta Singh. Ha ka jingïakren bad ki nongthoh khubor, u SP Shivakanta u la ong ba ka jaka treikam jong ki pulit ka Imphal ki la ïoh jingmudui ha kaba ïadei bad ka jingshah rahbor jong une u khynnah pule ïa uba la tip kyrteng kum u Laishram Chinglen Singh, uba la 22 snem ka rta na DM College jong ka Science New Boy’s Hostel ha ka 8 tarik, Nohprah ha ka por 1.30 nohphai sngi.
