Warsaw, Nohprah:
Ka Dorbar jong ka Poland ka la jied ia u nongialam jong ka seng Centrist Party u Donald Tusk kum u Myntri Rangbah bathymmai. Kane ka long hadien 8 snem ba kane ka Ri ka la ioh da uwei pat u nongmihkhmat uba dei na kawei pat ka seng saiñ pyrthei.
Hadien ar bnai jong ka National Election u Tusk u la rah ia ka nam jingjop ha ka ilekshon pyrshah ia kiwei kiwei ki seng saiñ pyrthei.
Ha ka jingai jingkren u Tusk sha ki lad pathai khubor u la smai ba un iatreilang bad ki seng sain pyrthei kiba don ha kane ka ri bad kumjuh ruh ialeh ban wanrah ka jingiatylli wat bad ki seng kiba long pyrshah bad ka Centrist Party. Ha ka jingñiew vote kaba la long ha ka sngi nyngkong u Tusk ula ioh haduh 248 vote na ka 201 bad u Tusk un sa shah pynbam smai ha u President Andrzej Duda.
Ha ka ilekshon kaba la long u Tusk u la pynliem noh ia u Myntri Rangbah barim u Mateusz Morawiecki bad ha kine ki snem ba la leit ka Law and Justice (PiS) Party kaba la synshar ia Poland ka la mad tang da ki jingshah kynthoh halor shibun ki jingjia ha kane ka ri.
Ha ka jingai jingkren sha ki lad pathai khubor hadien ba ula shah jied kum u Myntri Rangbah u Tusk u sngew ba ka long ka jingjop bakhraw ia ka seng Centrist Party ban don ha ka bor bad ban wanrah shibun ki jingkylla ha kane ka ri.
U Tusk uba long ruh u President barim ka European Council u don kawei ka jingangnud na ka bynta ka Poland bad kane ka dei ban pyniajan bad ki ri kiba long bad dei ruh ki dkhot jong ka EU bad kumjuh ruh ban ai jingkyrshan ia ka Ukraine.
