Kabul, Nohprah:
U Symbud Myntri ka tnat kam bar ri jong ka Afghanistan, u Sher Mohammad Abbas Stanikzai ha kane ka sien u la kren halor ka jingbym kwah jong ki paidbah nongshong shnong ka Afghanistan ban iajan bad ki bor pyniaid ka Taliban, ha kaba u la pynksan bad ong ba ka jing jngai jong ki paidbah na ka Taliban ka long namar ka jingshah khang jong ki kynthei ha ka liang ka pule- puthi.
Haba ai jingkren ha katei ka sngi, utei u heh nongialam ka kynhun lehnoh Taliban u la ban jur ruh halor ka jingdonkam ban plie biang noh ia ki skul naka bynta ki khynnah kynthei naduh ka kyrdan klas-6 shaneng. Namar u la ong ruh ba ka ri ka bym don jingnang- jingstad bad ka imlang- sahlang ka bym don jingnang- jingstad ka long kaba dum.
Ia katei ka jingialang ha katei ka sngi, la pynlong bad pyniaid da ka tnat Ministry of Borders & Tribal Affairs kum shi bynta ban rakhe ia ka jingkiew jong ki khynnah pule hapoh ka jingkhmih jong katei ka tnat.
Haba ai jingkren ha katei ka por, utei u Myntri ka Sorkar Taliban u la ong ba ka dei ka jingshisha, ba ki paidbah ki dawa ia ka hok namar u Blei bad u Prophet ki la dep bynta ia ka hok long- briew man- briew jong uwei pa uwei bad kumta yn nym don mano- mano ruh ba lah ban knieh ia ka hok jongki.
Namarkata, la ong ba ka Sorkar Taliban kan hap ban phai khmat noh sha kane ka bynta kaba la ktah jur ia ka jinglong- jingman hapoh ka ri bad wat ka jingiadei bad kiwei pat ki ri ba marjan ruh ka la tlor noh namar ka jingshah knieh noh jong ki khynnah-samla kynthei ka Afghanistan ia ki hok ba ki dei ban ioh kum ki paidbah.
Watla katta, la ong ba ka Taliban, ym tang ba ka la knieh noh ia ka hok pule- puthi jong ki khynnah- samla kynthei hapoh ka ri Afghanistan, hynrei ka Taliban ka la khang pyrshah ruh ia ki kynthei ha ki liang baroh naduh ki kam paidbah, ka jingleit sha ki jaka leh kmen, ka jingleit sha ki jaka shangkai pyngngad bad la lah ruh ban ong ba ka Taliban ka la shu synshar donbor bad khang ia ki kynthei ha baroh ki liang naduh ka pule- puthi, ka kam sngewbha bad kim don shuh wat tang ka hok ba kin im laitluid katkum ka mon jongki.
