Shillong, Nohprah 12
Ka Umphrup SC ka la pynliem noh ïa ka Smit SC da 4-2 kol na ka bynta ban khur ïa ka jingjop ha ka Second Division Football League 2023 ba la pynïaid Shillong Sports Association.
Ha kane ka jingïakhun kaba la long ha ka Sngi Ba-ar ha SSA Stadium, ka Umphrup ka la pynkhih jar nyngkong eh lyngba u Freddy Kharbyngar ha ka minit kaba 26. Hadien shiteng kynta kane ka kynhun ka la pynbud biang ïa ka kol kaba ar lyngba u Nangseiboklang L. Nongbri ha ka minit kaba 34.
Hadien san minit ka Smit ka la lah ban pynphai kylla shi kol lyngba u Kalbest Pathaw. Haduh kaba kut jong ka kylla step ka Umphrup ka dangtam ïa ka Smit da 2-1 kol.
Hadien katto katne por ba la bteng ïa ka jingïakhun jong ka kylla miet, u Nangseiboklang u la pynbud biang ïa ka kol kaba ar ka jong u ha ka minit kaba 65. Hadien shi minit ka Smit ka la pynphai kylla lyngba u Balajied Lyngwa.
Hashwa ban wan ka Umphrup ka la ïoh ban thep biang sa shi kol lyngba u Wallambor Kharumnuid ha ka minit kaba 81 na ka bynta ban khur syndon ïa ka jingjop.
Haba phai sha kawei pat ka jingïakhun kaba ar, ka Laitlyngkot SC ka la pynliem noh ïa ka Marbisu SC da 2-0 kol. Ïa kine la thep da u Sebastian Nongrum ha ka minit kaba 53 bad u Tiplut khongmuid (55).
Kane ka lympung kan bteng biang ha ka sngi Balang ha kaba ka Nongkrem SC kan ïakhun pyrshah ïa ka Mawtawar SC ha ka por 2:15 janmiet.
