Chandigarh, Nohprah:
U President jong ka seng BJP ha Punjab u Sunil Jakhar u la ong ba ka jingjop jong ka seng BJP ha ka ilekshon Assembly ha ki lai tylli ki jylla ka la pynshaïong bad ktah jur ïa ka kynhun ka liang pyrshah naba ki nongthep vote ki la thep ïa ka vote jong ki da ka jinglah ban bishar bniah halor ki kam jong u Myntri Rangbahduh u Narendra Modi.
Ha ka jingai jingkren sha ki nongthoh khubor ha Punjab, u Jakhar, ha ka por ba u dang tangon tyngeh ïa ka seng Congress bad ka seng Aam Aadmi Party, u la ong ba ki jingkular kai, ki jingbyrngem bad ki jingpyndonkam da ki kyntien kiba sniew pyrshah ïa ka seng BJP ki la long ka bainong halor kine ki jingleh bakla naba ki briew ki la tip bad sngewthuh haba ki la don ki kam pynroi bad ki jingmyntoi hapoh ka ri, ym don mano mano ruh ki ban ïahap bad u Modi.
“Ka jingïohi jngai jong u Myntri Rangbahduh bad ki rukom pyntreikam kin sa poi bad sakhi shaduh ki kyndong kynshrot jong ka Punjab. Ngi la long kiba la khreh na ka bynta ban jynrat ïa ka seng Congress bad ka AAP ha ka jylla ha ka ilekshon ban wan,” u la bynrap.
Ha ka jingai jubab ïa ka jingkylli halor ka jingbym lah leh ei ei jong ka seng Congress, u Jakhar u la ong ba ka seng kan sa shah sar noh ha Punjab bad shen ka kynhun synrop INDIA kan sa shah ktah jur.
