Saipung, Nohprah 12
Ka Jalaphet Moochut Pyr -dung SC ka la rah ïa ka nam lahduh ha ka lympung ïalehkai First Division Football Tournament ba la pynïaid da ka Saipung Block Sports Association (SBSA).
Kane ka nam jop ka la wan urlong hadien ba ka la lah ban pynliem noh ïa ka Mulait Bri Sumer SC da 1-0 kol ha ka jingïakhun phainal kaba la long ha madan Lamyrsiang ha ka Sngi Ba-ar. Ïa kane ka shi kol la lah ban pynurlong lyngba u Thomas Dkhar.
Kane ka jingïakhun phainal naduh ba sdang haduh ban da kut ka por ba la buh ka la long kaba ïakhaid bha ha kaba baroh ar tylli ki kynhun ki la ïaleh katba lah ban ïoh pynkhih jar, hynrei kim shym la lah ban pyndonkam bha ïa ki kabu thep kol ha baroh ar kylla.
Kumta ki bor pynïaid ki la rah noh ïa ka jingïakhun sha ka ‘extra time’ bad dei hangne ba ka Jalaphet Moochut Pyrdung ka la ioh ban thep hi jlang ha ka minit kaba 114 lyngba lyngba u Thomas Dkhar, u bym shym la pynlehnohei ïa ka kabu ksair na ka bynta ban khur syndon ïa ka nam lahduh.
Ka lahduh jong kane ka lympung ka la ïoh ban khur ïa ka song pisa kaba T.15 hajar tyngka ryngkat ka trophy, katba ka kynhun kaba wan ba ar ka la ïohpdiang ïa ka khusnam pisa kaba T.10 hajar tyngka ryngkat ka trophy.
Ha kane ka sngi la sam ruh ïa ki khusnam sha ki rangïalehkai kiba la ïaleh-kai bha ha kane ka lympung kum ka khusnam ‘Player of the match’ ba la ïoh da u Kinison Chyr-mang jong ka Mulait Bri Sumer SC, ka nam ‘Best Goalkeeper of the Tournament’ ka leit sha u Kos Dkhar jong ka Mulait Bri Sumer, ‘Top scrorer’ la ïoh da u Rahul Bareh jong ka Jalaphet Mochut Pyrdung SC bad ‘Player of the Tournament’ la ïoh da u Ripil Chyrmang jong ka Jalaphet Moochut Pyrdung.
La sam ïa ki khusnam sha baroh ar kynhun da u kongsan u Bah Aron Bamon uwei na ki riew pawkhmat ka thaiñ ha ka jingdonlang u President ka SBSA u Bah Victor Suja, Bah Rimi Shadap, General Secretary bad kiwei kiwei ki dkhot ka SBSA.
Ha kawei pat ka liang ka jingïakhun final jong ka Super Division Football League kan long ha ka 18 tarik hapdeng ka Mulait United FC pyrshah ïa ka Lamyrsiang SCC ha ka por 12:30 mynsngi.
