Shillong, Nohprah 12
U coach ka Kerala Blasters FC u Ivan Vukomanovic, u la shah sospon na ka bynta kawei ka jingïakhun ryngkat ka kuna kaba T. 50,000 ha ka disciplinary committee jong ka AIFF hadien ba u la kynthoh pyrshah ïa ki rephri ha ka jingïalang bad ki nongthoh khubor myn ha ka 29 tarik u Naiwieng.
Katei ka jingkynthoh pyrshah ka dei hadien ka jingïakhun pyrshah ïa ka Chennaiyin FC, ha kaba ka jingpynpaw jong u Vukomanovic ka long halor ka jingshah rem na ka daw ki jingrai bakla da ki rephri.
Ha katei ka jingïalang bad ki lad pathai khubor, u Vukomanovic u la pynpaw halor ki rai bakla jong rephri kum ka offside bad ka jingbym lah ban shim rai da ki bor pynïaid pyrshah ïa ki. U la pynpaw ruh ka mynsiem ka jingbym hun halor ka jingshah thep kol nyngkong eh ha ka minit kaba nyngkong.
“Ka jingshah thep kol tang ha ka minit kaba nyngkong pyrshah ïa ka Chennaiyin ka pyni ba ngim lah ban shan slem hapoh ka shi snem. Watla ka la pyni shai kdar ba ka dei ka offside pyrshah ïa u rangïalehkai ka liang pyrshah, hynrei ki rephri kim shym la pynpaw eiei halor ka jingthep kol ha ka minjit kaba nyngkong,” u la bynrap.
U la bynrap ruh da kaba ong ba katei ka jingbakla ban shim rai da ki rephri ka dei kaba la pynshai kdar ba ka dei ka jingshah pynur uwei na ki rangïalehkai jong u, u Hormipam Ruivah ha katei ka jingïalehkai. U Vukomanovic u la pynpaw ïa ka jingdiaw mynsiem da kaba ong, “Haba peit lyngba ki video, phin sa sngewphyla ba balei phim lah ban ïohi ïa kata ka jingbakla. Ka offside ha kaba u linesmen um lah ban ïohi eiei. Ha ka jingshisha ngi kwah ban ïalehkai bha, hynrei ki rephri kim shym la lah ban ban pynïaid ia ka jingïalehkai ha ka rukom kaba dei.”
Halor katei ka jingkyn -thoh, u Ivan Vukoma-novi? un ym lah ban ïadon bynta lang ha kawei ka jingïakhun jong ka India Super League pyrshah ïa ka Punjab FC ka ban long ha ka 14 tarik mynta u bnai. Ka disciplinary committee jong ka AIFF ka la pynpaw kam long kaba ïahap ban kynthoh pyrshah ïa ki rephri.
