Shillong, Nohprah 12
U Apandanka Marak u la ïai bteng ban ïalehkai bha ha ka lympung ïalehkai U-16 boys’ Vijay Merchant Trophy na ka bynta ban ïoh ïa ka hat-trick pyrshah ïa ki nongtied ba kynsai ka Arunachal Pradesh ha ka sngi Ba-ar ha Cuttack.
Ka Arunachal ka la jop ïa kynting pisa hynnin ka sngi bad ka la shimti ban tied nyngkong ha kaba ka la lah ban kamai tang 116/10. U Gaurav Jyoti Thakuria u la lah ban khur 6 wiket na ka bynta ka Meghalaya, uba la lah ban pynurlong ban kynjoh sha ki 304 run bad shah pynhap wiket baroh ryngkat bad u Rudra Singh Rathore (107).
Haba sdang ïa ka inning kaba ar hynne ka sngi, ka Arunachal ka la kamai tang 31/5, bad u Apandanka u la lah ban khur 4 wiket.
Ki hat-trick kiba u la khur ki la wan ha ki ar over ha kaba baroh lai ngut ki nongtied ki la shah pynkhyllem noh. Une u rangïalehkai u la lah ban pynhap ïa u Nabam Ganiabad bad hadien ïa u Tana Hurka.
U Apandanka u la lah ruh ban pynhap wiket ia u Nabam Jenam na ka bynta ban khur ïa ka hat-trick na ka bynta ban pynlong ïa ka kynhun jong u ban ïalehkmen.
Hadien u Apandanka u la lah ruh ban pynhap wiket biang sa ïa u Paisal Ali (1/11 in 6).
Hynnin ka sngi, u Apandanka u la khur 3/43 ha ki 13 over, hynrei ka la long ka sngi jong u Thakuria, uba la lah ban khur 6/23 ha ki 11.2 over ha kaba ka Arunachal ka la shah pynkhyllem noh ha ki 40 over bad kamai 116 run. U Mewankitbok M Kharpuri (1/16 in 7) u la long sa uwei pat u nongpynhap wiket. Hadien u Thakuria u la shimti biang ban kawang bol ha ka inning kaba ar jong ka Arunachal bad lada u lah ban pynurlong, u lah ban khur ïa ka hat-trick namar u la lah ban pynhap ïa ki ar ngut ki nongtied ha ka inning kaba ar nyngkong.
Ka jingïalehkai lang ki ar ngut ki nongtied kiba nyngkong jong ka Meghalaya hapdeng u Rudra bad u Gaurav Narleng, ka la pynlong ban kynjoh sha ki 122 run hashwa ban shah pynhap ka wiket kaba lai. U Rudra u la tied 107 run na ki 273 bol (12x4s), katba u Narleng u la tied 67 run na ki 142 bol (11x4s).
Kiwei pat ki nongtied kiba kynthup ïa u Paisal (34 run na ki 71 bol) bad u Mewankitbok (25 run na ki 84 bol) ka la pynlong ïa ka Meghalaya ban kynjoh sha ki 300, na ka bynta ban jop ïa ka liang pyrshah da 188 run ha ka inning kaba nyngkong.
