Kolkata, Nohprah:
Ka Myntri Rangbah jong ka West Bengal ka Mamata Banerjee ka la thmu ban leit ïakynduh ïa u Myntri Rangbahduh u Narendra Modi ha New Delhi ha ka 20 tarik, Nohprah na ka bynta ban dawa ha ka ban phah pyllait ïa ka pisa kaba dang sah jong ka jylla, la ïathuh u heh sorkar.
Ka Prime Minister’s Office (PMO) ka la mynjur ïa ka jingkyrpad jong ka Banerjee na ka bynta ka jingbuh por ban ïakynduh bad u Modi, la ong u heh sorkar.
“Ka jingïakynduh kan sa long ha ka por 11 baje mynstep ha ka 20 tarik, Nohprah,” la ong u heh sorkar ha ka jingïakren bad ki nongthoh khubor. Ka Mamata Banerjee ha basdang jong kane ka taïew ka la pynshisha da kaba ong ba ka sorkar kmie ka la dei ban siew ïa ka pisa kaba sah kaba long T. 1.15 lak klur sha ka West Bengal ha kiba bun ki Accounts, kynthup ka bai bylla 100 sngi kaba hap hapoh ka jingtreikam jong ka skhim MGNREGA.
