Shillong, Nohprah 13
Ka lympung ïalehkai “1st Meghalaya International Open Grandmasters Chess Tournament 2023” ka la sdang ha ka sngi Balang ha SAI Indoor Training Hall kaba don ha NEHU.
Ïa kane ka lympung la pynïaid da ka Meghalaya Chess Association (MCA) hapoh ka jingkhmih da ka All India Chess Federation, la plie da u Director ka tnat Education and Literacy jong ka Sorkar Jylla u Swapnil Tembe bad uba long ruh u Adviser ka MCA kum u kongsan, ha ryngkat ka jingiadon lang u Asst Director tnat ïalehkai ka Sorkar Jylla u Bah Khroobok Pasaah kum u symbud kongsan, lem bad ki dkhot ka MCA.
Ha kane ka jingïakob la wan ïashim bynta da ki grand master kiba na ki 11 tylli ki ri ka pyrthei kiba kynthup kiba na ka ri USA, Russia, Bangladesh, Sri Lanka, Egypt, Geor-gia, Vietnam, Uzbekistan, Nepal bad kumjuh ki nongïalehkai kiba la wan na ki jylla bapher bapher jong ka ri.
Na ka liang ka Jylla ka la pynmih ruh ïa hynñiew ngut ki nongïalehkai ki ban ïashim bynta ha ka A Category bad 65 ngut ha ka B Category. Ha ka Category ‘A’ kaba dei tang ki ‘rated player’, katba ha ka Category ‘B’ ki dei kiba don tang hapoh 1599.
Ïa kane ka lympung ïalehkai yn pynkut ha ka 20 tarik u Nohprah 2023 bad na ka liang ki bor pynïaid ki la pynkhreh ruh ïa ki khusnam pisa kiba la kot haduh T. 30 lak tam na ka bynta baroh ki nongjop.
Kat kum ka jingpynpaw dangshen da ki dkhot ka MCA la ong ba kane ka lympung kan long ka jingïarap ban pynshlur ïa ki nongïalehkai ka Jylla ba kin don ïa ka ‘rating’ namar ym pat ju don kum kine ki ‘rating tournament’.
