Shillong, Nohprah 13
Ka lympung ïalehkai Second Division Football League 2023 ba la pynïaid da ka Shillong Sports Association ka la nangjam shaphrang ha kaba ka Mawtawar SC ka la khur ïa ka jingjop ha ka sngi Balang.
Kane ka nam jop ka la wan urlong hadien ba ka la lah ban pynliem noh ïa ka Nongkrem SC da 2-0 kol na ka bynta ban khur ïa ki lai point.
Ha kane ka jingïakhun kaba la long ha SSA Stadium Polo, baroh ar ki kynhun ki la pyrshang ban ïakhun tyngeh ha kaba ki la ïoh ïa ki katto katne ki kabu kiba biang, hynrei kim shym la lah ban pynurlong.
Hadien shiteng kynta ka Mawtawar ka la ïoh ban pynkhih jar nyngkong eh lyngba u Ricky Chyne ha ka minit kaba 39 bad kane ka shi kol ka la neh haduh kaba kut jong ka kylla step.
Ka Mawtawar ka la pynbud biang ïa ka kol kaba ar hashwa ban wai lyngba u Elnathan Donkupar Wahlang ha ka minit kaba 83 bad kane ka shi kol la biang pura na ka bynta ban khur syndon ïa ka jingjop.
Ka jingïalehkai ha ka sngi Palei kan long hapdeng ka Imson FC pyrshah ïa ka Nongrah SC ha ka por 11:30 mynstep, katba ha ka por 2:15 janmiet ka Sohiong SC kan ïakynduh pyrshah ïa ka Jongksha SC.
