Washington, Nohprah:
U President ka United States- u Joe Biden ha ka Sngi Ba-ar u la maham tyngeh ia u Myntri Rangbahduh ka Israel- u Benjamin Netanyahu ba ka Israel ka lah ban duh noh ia ka jingkyrshan bad ka jingiadei bad kiwei pat ki ri jong ka pyrthei namar ka jingleh kput da kaba ther bom dusmon ia ka Gaza khlem da pyrkhat shuh ia ki paidbah ba lui-lui kiba shong hangto.
Kumta, u Biden ha katei ka sngi u la ong ba ka Israel ka dei ban sngewthuh ia kane bad ka hap ban shim ia ka rai, la kan kylla noh ne ka kwah ban duh ia ka jingkyrshan jong ki ri bad ki tnat bapher bapher jong ka pyrthei baroh kawei.
Kane ka long ka sien ba nyngkong ia u President ka US ba un maham bad kren pyrshah ia ka Israel halor ka jing-leit hiar thma pyrshah ia ka Gaza hadien ba ka kynhun lehnoh Hamas ka la leit ban hiar thma nyng-kong ia ka Israel ha ka 7 tarik u Risaw.
Katba la ong ba u Myntri Rangbahduh ka Israel, u la pynpaw ka jingsngew lyngngoh halor katei ka jingkylla jingmut jong u President ka US namar naduh kaba sdang dei ma u, uba ai jingkyrshan ia ka Israel ban bteng ia ka thma bad ban pynhiar kput ia ka jingleh jong ki lehnoh Hamas na Gaza. Hynrei kynsan ha kane ka kynti, u Biden u la maham kylla ia u Netanyahu ba ka Israel ka dei ban pynsangeh noh ia ka thma, lem kumta ka Israel kan sah marwei lada baroh ki ri bad ki tnat bapher jong ka pyrthei kin ïeng ban pyrshah ia ka jing-leh jong ka Israel.
Hynrei u Biden u la ong ba na kaba sdang ka Israel ka la ioh ia ka jingkyrshan na jan baroh ki ri ka pyrthei lait noh na kito ki ri Muslim. Katba, ka jingleh palat pud jong ka Israel ha kane ka por ka la pynlong ia kitei ki ri ba kin pyrshah kylla ia ka Israel namar kam shym la pyrkhat shuh ia ki paidbah nongshong shnong ka Gaza bad ka la shu ther bom naphang khlem sangeh bad khlem ailad shuh ia ka Gaza.
