Shillong Nohprah 13
Ka Executive Committee jong ka Khasi Hills Autonomous District Council (KHADC) ka la mynjur ïa ar tylli ki aiñrew (bill) bad yn sa wanrah sha Ïingdorbar ha ka Dorbar Tlang na ka bynta ban ïoh ka jingmynjur.
Ïa kine ki aiñrew la ai jingmynjur da ka Executive Committee ha ka jingïalang kaba la long ha ka Sngi Balang.
U CEM ka KHADC, u Bah Pynïaid Sing Syiem u la ïathuh ba ka EC ka la ïatai biang ïa ki bynta kiba don ha kane ka aiñrew hadien ba la wanrah ïa kaiphod jong Special Committee kaba khlieh da u Deputy CEM Bah PN Syiem bad ai jingmynjur ban wanrah sha Ïingdorbar ha kane ka Dorbar Tlang ka ban long lai sngi ha ka 20, 21 bad 22 tarik mynta u Nohprah.
U la ong ba ka aiñrew halor ki kur ki jait ka dei na ka bynta ban pynïatylli ïa ki kur bapher bapher bad ai jingithuh ïa ki kur bad ki seng kur kaba kynthup ruh ban pynbeit ryntih ïa ka rukom treikam jong ki seng kur bapher bapher.
Ïa kane ka aiñ la tip kum ka KHAD (Social Custom of Clan Administration) Bill bad kawei pat ka dei ka aiñ ban pynkylla ïa ka United Khasi Jaiñtia Autonomous District Fisheries Act. Halor ka jingïapher ka Clan Bill bad ka Lineage Act, u CEM u la ong ba ha kane ka Clan Bill ka don ruh ka bynta ban peit ïa ka ‘Tangjait’ katba ka Lineage Act ka kham pynlut jingmut haba ïadei bad ka jingithuh ïa ki Khasi kiba dei ruh ban ïoh ïa ka syrnot Schedule Tribe.
U la ong ruh ba ka Clan Bill ka wan ha ka nongrim jong ka longkur longkha ha kaba ki kur kin tip bad ithuh ïa kiba dei na kajuh ka kur kumjuh ruh ban ithuh ïa kiba kha kiba dei na ka liang jong u kpa.
Haba ïadei bad ka jingpynkylla katto-katne ïa ka United Khasi Jaiñtia Fisheries Act u la ong ba ka jingthmu ka long ban aibor ïa ki shnong bad da kaba ïatreilang bad ka Council ban pynneh pynsah ïa ki um ki wah bad ki dohum dohwah khamtam ban nym pynïap dusmon. U la ong kane ka aiñ ka don ka jingïadei kaba jan ruh bad ka jingpynneh mariang.
