Westmoreland, Nohprah:
Katkum ki khubor la ong ba uwei u khynnah 4 snem na Westmoreland County jong ka United States, u la ioh kum siat bakla ialade da ka suloi. Na ka liang ki bor pyniaid katei ka nongbah ki la tei pop bad pynngat ia ki kmie-kpa jong utei u khynnah rit hapoh ki kyndon pynkheiñ aiñ jong ka jingbuh jingma ia ki khun ki kti bad ka jingbym phikir ia ki tiar kiba ap jingma ia ki khyllung-khynnah.
Ki bor pyniaid katei ka County ki la ong ba kane ka long ka jingjia kaba sniewbok haduh katta katta ba utei u khyllung 4 snem u la shu duh ei ia la ka jingim tang namar ka jingbym phikir jong ki kmie-kpa ki bym lah ban buh bha ia katei ka tiar kaba ap jingma ia ki khun-ki kti jong ki. La ong ruh ba ka don tang kawei ka lad ban iada ne pyllait na kum kine ki jingjia bad kata ka long tang ban shu buhrieh bha ia ki tiar kiba ap jingma ia ka jingim ki khyllung-khynnah ha ka jaka kaba shngaiñ bad ka ban jynjar ia ki ba kin ioh ne sei.
Ia utei u khyllung 4 snem la ithuh kyrteng kum u Ronnie Lynn, bad la shu pynkit ia u nalor suiñ ban pynpoi sha ka jaka sumar ha ka 6 tarik u Naitung ba katei ka jingjia ka la jia hadien ba u la ioh kum siat ialade da ka suloi rit hapoh ka iingsah jongki ha Gaudio Drive hapoh ka Rostraver Township.
Hynrei, ha kane ka kynti ki pulit ki la iathuh ba hadien ka jingtohkit bniah kaba la shim por da ki bnai, la shem ba ia katei ka suloi la shu buh ha ka madan jong ka kamra thiah jong katei ka iing bad ka dei ruh ka suloi kaba la dep pynbiang kuli lypa ‘Loaded’ sa tang ban shu siat beit noh. La ong ba baroh 2 ngut shi kurim, kiba long ki kmie ki kpa jong utei u khyllung, ki don hapoh iing hi, ha ka por ba ki ïohsngew ia ka jingriew jong ka suloi bad ka jingriew kumba kyllon tiar ne ur ki briew, ha kaba ki leit ban mareh bad ki shem pynban ia u khun ba dang 4 snem jongki uba la thiah ha madan ha ryngkat ka snam kaba la tuid khlem sangeh bad mar kumta hi ki la pyntip noh sha ki pulit ban ioh pynkit noh mar-mar sha ka jaka sumar.
Kumta, la ong ba ka ïingbishar ha kane ka kynti ka la rai ban pynngat ia kitei ki shi kurim hapoh ki kyndon pynkheiñ aiñ jong ka ri, kiba iadei bad kaba buh jingma ia ka jingim ki khun- ki kti. Bad la ong ruh ba utei u khyllung watla u la lait im da ka said, hynrei un hap ban im ryngkat ki jingkynmaw ki ban pynsyier ia u baroh shi jingim namar jong katei ka jingjia kaba long ka jingbakla jong ki kmie- kpa jong u hi.
