Imphal, Nohprah:
Ha kaba ïadei bad ka jingjia kaba la wanrah jingjop bad pyllait na ki jingjia ki ban wanrah ïa ka jingsngewsih kaba khraw, ki shipai ki la lap noh ïa ki bom Improvised Explosive Device (IED) ba la buh halor ka jingthmu ban leh ïa ki kam thombor ha ka surok National Highway 102 hajan ka jaka ba marjan bad ka Bongyang ka ban leit sha ka shnong Sinam kaba don ha Tengnoupal distrik jong ka Manipur, kaba don ha khappud ba marjarn bad ka Myanmar.
Ka kynhun jong ki shipai Assam Rifles ka la lap ïa kawei ka pla plastik kaba don ïa lai tylli ki Coil jong u Wire, ha ryngkat kine, la lap ruh ïa ki 21 tylli ki bom ba khlaiñ bor ki IED ba la buh ha shi lynter jong ka surok na Imphal sha Moreh, ka jaka sor kaba don ha ka bynta khappud ba la pynïasoh ïa ka India bad ka Myanmar ha ka thaiñ Manipur.
Ki shipai ki la ong ba ki lehnoh ki la thmu ban leh ïa ka kam thombor kaba shyrkhei lyngba ka jingbuh jong ki ïa kine ki bom IED, ha kaba kane ka la buh jingma ïa ki kali shipai bad ki kali jong ki riewpaidbah kiba dei ban ïaid lyngba kane ka surok. Kane ka jinglap jong ki shipai ïa kine ki bom ka la wanrah ïa ka jingjop kaba khraw ha kaba la lah ban ïada ïa ka jingim jong kiba bun ki briew.
Hadien ba la lap ïa kane, la pynsted ïa ka jingpyntreikam bad la khot ruh ïa ki kynhun pynduhbor ïa ki bom kiba tbit na baroh ar tylli ki jylla bad kumjuh ki shipai ka sorkar kmie ki la her bran bran sha katei ka jaka na ka bynta ban ai ka jingïarap ban pynduhduh bor ïa kine ki bom pynbthei khlem shah ktah ei ei.
