Shillong, Nohprah 13
Ka kynhun ki rangïalehkai jong ka Mawsynram na East khasi Hills lem bad ki ‘thei ïalehkai jong ka Jowai na West Jaiñtia Hills ki la long ki lahduh ha ka lympung ïalehkai 3rd Meghalaya Open Softball Championship 2023.
Ïa kane ka lympung la pynïaid da ka Meghalaya Softball Association (MSA) kaba la sdang naduh ka 11 tarik mynta u bnai badpynkut noh ha ka sngi Balang ha madan Second Ground Polo, Shillong.
Ha kane ka lympung ïalehkai kaba la neh lai sngi lynter, la wan ïashim bynta da ki kynhun ïaleh-kai kylleng ki district jong ka Khasi bad Jaiñtia kiba kynthup ïa ka Dkhiah na East Jaintia Hills District, Nongstoiñ na West Khasi Hills District, Nongpoh na Ri Bhoi District, Maw-synram na East Khasi Hills District, Jowai na West Jaiñtia Hills District bad Mawkyrwat na South West Khasi Hills District.
Ha kane ka sngi la ïadon lang u Asst Director ka tnat ïalehkai u Bah Khroobok Passah kum u kongsan, kumjuh u General Secretary ka Meghalaya State Olympic Association (MSOA) u Bah Finely Pariat kum u symbud kongsan, ha ryngkat ka jingïadon lang u President ka MSA u Dr. Aman War, Bah Denis Shabong working president ka MSA bad kiwei.
Ïa ka kyrdan ba-ar ha ka liang ki kynthei la ïoh da ka Lyntijam na Ri Bhoi District bad balai da ka Dkhiah kaba na East Jaiñtia Hills District. Katba ha ka liang ki shynrang ia ka kyrdan ba-ar la ïoh da ka Dkhiah kaba na East Jaiñtia Hills District bad ïa ka kyrdan balai la ïoh da ka Jowai kaba na West Jaiñtia Hills District.
Ïa ka nam Best Pitcher la khur da u Krishna Thapa na ka Dkhiah bad ka Larishisha Phawa na Dkhiah kaba na West Jaiñtia Hills District.
