Mumbai, Nohprah:
U MLA jong ka seng Nationalist Congress Party (NCP) u Rohit Pawar bad kiba bun kiwei pat ki la shahkem ha ki pulit ha ka por ba ki dang pynlong ïa ka jingïakhih ha Nagpur distrik jong ka Maharashtra ha ka sngi Ba-ar, la ïathuh ka tyllong khubor.
Ka ‘Yuva Sangharsh Morcha’ (ka jingïaid paidbah ban pynpaw ïa ka jingpyrshah jur) ïa kaba la pynïaid da u Rohit Pawar uba na ka seng NCP hapoh ka kynhun ba la lamkhmat da u Sharad Pawar ka la poi ha ka step jong kane ka sngi ha nongbah bad pynkut da ka jingïalang paidbah kaba la long ha Tekdi Road.
Ki nongïashim bynta ha kane ka jingïaid paidbah ki la kwah ban aiti ïa kiba bun ki dorkhas jingdawa jong ki ha kaba ki la ïoh ban lum na ki briew ha ki lynti ha ka por ba la don ka jingïaid paidbah, hynrei ym shym don mano mano ruh na ka liang jong ki nongmihkhmat jong ka sorkar Maharashtra ki ban wan ban pdiang ïa kine ki dorkhas, la ïathuh u Rohit Pawar ha ka jingïakren bad ki nongthoh khubor.
Ki nongbud jong ka seng NCP kiba la dap da ka jingbitar ki la sdang ban pyrta da ki kyntien kiba pyrshah bad pyrshang ban leit sha Legislature Complex.
Kumjuh, ki pulit ki la kem ïa u Rohit Pawar, u Salil Deshmukh, Sangram Deshmukh bad kiba bun kiwei pat ki nongbud jong ka seng NCP, la ïathuh ki heh pulit.
Kane ka jingïaid paidbah ka la sdang na Pune bad ïaid lyngba ha ka lynti ïaid kaba la jngai ha kumba 800 km hashwa ban poi ha ka nongbah ha ka por ba ka Dorbar Tlang jong ka Maharashtra Legislature ka dang ïaid shakhmat.
