Shillong Nohprah 13
U Myntri Rangbah ka Jylla u Conrad K. Sangma ha ryngkat bad u Myntri ka tnad ïalehkai ka Sorkar Jylla u Bah Shakliar Warjri ha ka sngi Balang ki la plie ïa ka Nongkseh Indoor Stadium.
Ha kane ka jingplie ïa ka Indoor Stadium kaba la tei ha ka jinglut kaba T. 1.41 Klur, la ïadonlang ka Myntri ka koit ka khiah ka Kong Ampareen Lyngdoh, u MLA barim ka Mylliem uba long ruh u nongaibuit jong u Myntri Rangbah ka Jylla u Bah Hamletson Dohling, ka Director jong ka Sports and Youth Affairs Kong Isawanda Laloo, u Rangbah shnong ka Raid Sawkur Nongkseh Bah A.L Thangkhiew, u President ka Nongkseh Sports, Social and Cultural Club Bah Daniel M. Thangkhiew bad kiwei kiwei.
U Myntri Rangbah ula ong, ba u dap da ka jingsngewtynnad ban ïoh plie ïa kane ka Indoor Stadium khamtam haba ha ki 2 ne 3 snem mynshwa ula wan bad u Bah Hamletson Dohling ban buh ïa u mawnongrim ban tei ïa kane ka Indoor Stadium.
“Ka sorkar kam tei tang ïa ka Indoor Stadium hynrei ka dei na ka bynta ki samla kaba ka sorkar ka lah ban ai khnang ba ki samla kin ïoh ban pyndonkam khamtam ban lait ha ka jingïaid ka lynti ka bym dei. Kum ka sorkar ngi pyrshang katba lah ban pynbiang ïa ki jingdonkam ban ïarap ban ïaid ha ka lynti ha kaba dei bad kane ka jingtei kan long lehnohei lada ym lah pat ban pyndonkam ïa ka ha ka lynti kaba dei. Nga kwah ban ïohi ba dei ban pynlong ïa ki prokram ki bapher ha kane ka jaka kum ki jingaihikai ïa ki samla ha kaba ïadei ban ïoh ïa ki skhim sorkar, ïohkam ïohjam bad kumta ter ter” la ong u Myntri Rangbah.
“Nga ngeit skhem ba ha ki sngi ban wan ba kane ka shnong kan trei borbah ban wanrah ïa ka jingkylla da kaba ïatreilang bad ka sorkar na ka bynta ban btin lynti ïa ki samla kaban long ruh kum ka nuksa ïa kiwei pat bad na ka liang la jong nga, ngan ai ia ka jingkyrshan” la ong u Conrad Sangma.
U Myntri Rangbah ula pynbna ban bhah T. 2.1 klur ban shna ïa ka Stadium bad ka madan ïalehkai ha Nongkseh bad ban shna ha ka ban kyntiew noh ïa ka Sub Center sha ka CHC.
U Myntri Rangbah ula kular ba yn wan ban plie ruh ïa ka Water Supply Scheme kaba la mang T.15 klur na ka bynta ban pynpoi ïa ka umbam umdih ïa ki paidbah ka shnong Nongkseh bad yn sa shim khia ruh ïa kiwei kiwei ki jingdawa ruh.
Ha kawei pat ka liang u Bah Shakliar ula ong ba ha ki 9 bnai kiba la dep, ula leit ha kylleng ki bynta jong ka jylla, la shem ba ki samla bad ki paidbah ha ka jylla bun ki ïeid ïa ka phutbol bad ki don ïa ka sap ka phong bad ka sorkar ka don ïa ka jingkitkhlieh ban kyntiew bad ban pynbiang ïa ki jingdonkam ha ka kam ïalehkai.
“Tang hapoh 9 bnai ngi la ai bun tylli ki Stadium ha kylleng ka Jylla mynshwa ka tnad ïalehkai kam don eiei hynrei mynta ka long kaba kongsan bha bad ki ophisar kila trei shitom ban kyntiew ïa ka kam ïalehkai. Ngi la ai 25 tylli ki Artificial Turf, Indoor Stadium bad ki Badminton Court na ka bynta ka jingmyntoi ki samla namar ngi angnud ba kin kiew ha ka kam ïalehkai. Ngi sngewthuh ïa ka jingeh ki khun samla ki jong ngi na kata ka daw ngi trei shitom” la ong u Bah Shakliar.
U la ong, ba kane ka jingplie ïa kane ka Indoor Stadium ka long kum ka jingai sngewbha Khrismas ïa ka shnong Nongkseh.
