Shillong, Nohprah 13
Ka Meghalaya ka la pynliem noh ïa ka Arunachal Pradesh da shi inning bad 78 run ha ka sngi kaba lai jong ka lympung ïalehkai U-16 boys’ Vijay Merchant Trophy ha ka sngi Balang kaba la long ha Cuttack.
Kane ka long ka jingjop kaba nyngkong eh ïa ka Meghalaya hadien ba ka la ïakhaid bad ka Nagaland bad shah rem ha ka Sikkim ha kaba sdang jong kane ka lympung ïalehkai.
Kane ka jingjop ka long syriem bad ka jingïakhun pyrshah ïa ka Arunachal ha ka U-19 Men’s Cooch Behar Trophy ha ki lai sngi ba la lah ha kaba ka Meghalaya ka la jop da shi inning bad 76 run.
Haba bteng ïa ka inning kaba ar ha ki 31/5, ki nongtied ka Arunachal ki la shah pynkhyllem baroh na ka bynta ban kamai tang 110 run hynne ka sngi. Da ka jinglah ban kamai 116 run ha ka inning kaba nyngkong, ka Meghalaya ka la lah ban pynpaw ïa ka jingtbit ha ka jingkawang bol.
U Paisal Ali bad u Gaurav Jyoti Thakuria ki la ïasam da kaba khur san wiket. U Ali u la khur 3 wiket na ka bynta ban pynkut da kaba kamai 4/29 ha ki 10 over, hadien ba u la khur sa shi wiket hynnin ka janmiet. Katba u Thakuria u la khur 2/10 ha ki 3.3 over, hadien ba u la lah ban pynkhyllem ïa u Armaan Jain.
Te kumta u Thakuria u lah ban khur ïa ka hat-trick lada u lah ban ïalehkai bha ha ka jingïakhun ka ban wan. Lah ban kdew ba u la don ha ka thup na ka bynta ban khur ïa ka hat-trick hynne ka sngi hadien ba u la lah ban pynkhyllem ïa ki ar ngut ki nongtied ka Arunachal.
Uwei pat u paralok nongkawang bol jong u, u Apandanka Marak u la lah ban khur ïa ka hat-trick hynnin ka sngi, hynrei um shym la lah shuh ban khur wiket hynne ka sngi bad u la ïai sah da kaba kamai 4/50 ha ki 12 over. Hadien ba u la lah ban khur 3/43 ha ka inning kaba nyngkong, u Apandanka ula lah ban pynkut da kaba khur 7/93. U Thakuria uba la khur 6/23 ha ka inning kaba nyngkong, u la lah ban bteng ha ka ban ïalehkai bha da kaba bteng biang ban khur 8/33.
Ka Meghalaya kan pynkhreh ïa ka jingïakhun ka ban wan pyrshah ïa ka Mizoram naduh 16 tarik mynta u bnai.
