Shillong, Nohprah 14
Ka Nongrah SC ka la pynjem khnap ïa ka Imson SC haduh 17-0 kol na ka bynta ban khur ïa ka jingjop ha ka lympung ïalehkai Second Division Football League 2023 ba la pynïaid da ka Shillong Sports Association ha ka sngi Palei ha SSA Stadium, Polo.
U Dawandapura Pathaw u la khur haduh ar tylli ki hat-trick, katba u Jonas Nongbri, Shanbok Marboh bad u Sondingroy Rngaid ki la ïathep mar ar kol.
U Dawandapura Pathaw u la ïoh ban thep hynriew kol ha ka minit ba 10, 15, 22, 28, 68 & 85. Ïa ki ar kol la thep da u Jonas Nongbri (36 & 45), Shanbok Marboh (47 & 71) bad u Sondingroy Rngaid (75 & 77). Katba ïa ki shi kol la thep da u Kynsaibor Wankhar (12), Dameshanbor Gashnga (27), Ronnie Pyngrope (63), Blanang Khongsdam (64) bad u Nangtei Kharlukhi (81).
Haba phai sha kawei pat ka jingïakhun kaba ar, ka Sohïong SC ka la pynliem noh ïa ka Jongksha SC da 2-0 kol. Ïa kine la thep da u Banshemlang Janong ha ka minit kaba 20 bad u Keystar Malngiang (75). Ka jingïalehkai ha ka sngi Thohdieng kan long hapdeng ka Umphrup SC pyrshah ïa ka Lumshyiap SC ha ka por 2:15 janmiet.
