Nongstoiñ, Nohprah 14
Ka kynhun ïalehkai jong ka Pyndengrei SCSC ka la bteng ban khur ïa ka jingjop ha ka ïalehkai Super Division na ka bynta ka NDSA Premier League Football Tournament 2023-24.
Ka nam tam jong ka Pyndengrei ka la wan hadien ba ka la lah ban pynliem noh da 4-0 kol ïa ka Sawlad ha ka sngi Palei ha madan NDSA, ha Nongpyndeng.
Shuh shuh haba phai sha ka miej ïakheiñ point jong ka Super Division, haduh mynta ka Pyndeng -rei ka dang ïai bteng ban long ka kynhun kaba lamkhmat napdeng kiwei ki kynhun ïalehkai ha kaba na ki san sien ïakhun ka la kamai 13 point. Nangta ka Khliehmawlieh YC ka wan ha ka kyrdan kaba ar ha kaba na ki saw sien ïakhun ka la kamai 10 point, katba ïa ka kyrdan balai la wan da ka Upper New Nongstoiñ ha kaba na ki saw sien ïalehkai ka la kamai 9 point.
Haba phai pat sha ka 1st Division, ka kynhun ïalehkai jong ka New Nongstoiñ ka la ïoh ban khur ïa ka jingjop da kaba ka la lah ban pynliem noh da 2-1 kol ïa ka Mawiongpyndengrei ha ka jingïalehkai kaba la long ha kajuh ka sngi.
Na ka liang ka Football Committee ka NDSA, ka la pyntip ruh ba ka jingïalehkai ha ka sngi Thohdieng ha ka Super Division ha ka por 12:05 mynsngi kan long hapdeng ka Tiehrit FC pyrshah ïa ka Upper New Nongstoiñ, katba ha ka por 2 baje janmiet ka Khliehmawlieh YC ïa ka Mawliehbah.
