New Delhi, Nohprah:
Ka India ha ka Sngi Ba-ar ka la ai jingkyrshan ia ka jingkhot jong ka United Nations General Assembly halor ka thma hapdeng ka Israel bad ka Gaza ba dei ban pynkut noh ia kane ka thma khnang ban ioh pynpoi ia ki lad jingiarap bad ki jingdonkam sha ki paid nongshong shnong ka Palestine hapoh Gaza. Ha kajuh ka por ruh ka Israel ka la kyntu ia ka Hamas ba ka dei ban pyllait noh shi syndon ia baroh kito kiba ka la rahbor naduh ba sdang jong ka thma ha u Risaw jong une u snem 2023.
Katei ka jingkhot jong ka UN ka long ban phah sangeh mardor ia ka jingleit hiar thma jong ka Israel pyrshah ia ka Gaza namar ka jingeh kaba la ktah jur ia ki paidbah nongshong shnong ka Gaza bad khnang ban ioh ban pynpoi ia ki mar bam bad ki jingdonkam baroh ba ki riew paidbah ki donkam. Kumta la ong ba ka UN ka la kyntu ia baroh ki ri ba kin ïeng tylli lang naka bynta ban ai jingkyrshan halor ka jingdawa ba dei ban sangeh noh ia ka katei ka thma, ha kaba yn ioh pat ban pynpoi ia ki lad jingiarap ba la ioh lum na ki ri bapher kum ka Algeria, Bahrain, Iraq, Kuwait, Oman, Qatar, Saudi Arabia, United Arab Emirates, ka Palestine bad kiwei kiwei de. Hynrei la ong ba ha katei ka jingia ai jingkyrshan, ka United States bad ka Israel ki la pyrshah ia katei ka jingkhot jong ka UN ban pynsangeh noh ia katei ka thma jong ka Israel.
Kumta la ong ba ha katei ka jingia ai jingkyrshan kumba la khot da ka United Nations, ka India ruh ka la long kawei na ki ri kaba la ai jingkyrshan ia katei ka jingdawa ba dei ban pynsangeh noh ia ka thma Israel hapoh Gaza naka bynta ka jingdonkam jong ki paidbah nongshong shnong ka Palestine kiba don hapoh Gaza.
Nalor katei ka jingai jingkyrshan ban phah sangeh noh ia ka thma, ka India ka la kyntu ruh ba ka Israel bad ka Hamas ki dei ban ailad ban pynpoi ia ki lad jingiarap ba la noh synñiang da ki ri bapher sha ki paidbah nongshong shnong ka Gaza.
La ong ba ki don palat 1,200 ngut ki nong Israel, kham bun dei ki riew paidbah, kiba la duh ei noh ia ka jingim ha ka jingleit thombor ba kyndit jong ki lehnoh Hamas ha ka 7 tarik u Risaw. Kumjuh ruh ka Israel ka la pynphai kylliang bad pynhiar kput ia katei ka kynhun lehnoh kaba don hapoh ka nongbah Gaza jong ka Palestine, da kaba phah leit hiar thma ia ki shipai Israel naduh suiñ haduh ryngkew bad kaba la wanrah pat ia ka jingïap jong palat 18,000 ngut ki briew ha Gaza, 70% napdeng kitei kiba khlad ha kane ka jingleit hiar thma jong ka Israel ki dei ki kynthei, longkmie bad ki khyllung- khynnah.
