Shillong, Nohprah 14
Kawei ka longkmie kaba kyrteng Kong Shemlin Khongjoh, 52 snem ka rta, na ka shnong Nongryngkoh, kaba hap ha Mawkynrew konstitwensi, East Khasi Hills District ka la khlad noh hadien ba ka sumo ba ka shong ka la kylla tang namar ka jingsniew palat ka surok. Kane ka la jia ha ka 13 tarik mynta u Nohprah ha ka por 7:00 baje mynstep katba ka dang mut leit die jingdie sha ïew Jatah.
Katkum ka jingbatai u President ka Seng Samla Nongryngkhoh Bah E. Surong u la ïathuh ba kane ka sumo kaba la kit ïa ki nongleit ïew haba kam lait shuh ban kiew ïa ka surok mar shu mih na shnong ka la kylla. Nalor nangta u la ong ba kane ka longkmie kaba khlad ka don khun 7 ngut bad la tep mynta ka sngi ka 14 tarik Nohprah katba kiwei kiba shong lang ki la mynsaw.
U la ïathuh ba ka surok ban leit sha Nongryngkoh kaba don 800 ngut ki nongthep vote hap ïaid na Nohron kaba jngai kumba 3 kilometer, hynrei kane ka surok kaba la shna da ka skhim PMGSY ka la sniew palat haduh ba ka la ishyrkhei ban ïaid ki kali.
U la pyntip ba ha ka 13 tarik mynta u bnai kaba dei ka sngi ïew, u nongñiah sumo u la kit ïa ki nongleit ïew ban kit ïa ki mar rep ban leit die sha ïew Jatah. Haba u la kiew um lah shuh ban ïakhun bad kane ka sumo kaba la kyllon ka la ban ïa kane ka longkmie bad khlad syndon, katba kawei ka longkmie kaba shah ban da u nar ka la shu mynsaw.
U Bah Surong u la ïathuh ba ïa kane ka surok la shna na ka skhim PMGSY bad haduh mynta ka jinglut ka la poi 10 klur tyngka tangba ym pat dep haduh mynta.
Shuh shuh u la ïathuh ba ki kali rit ki hap ïeng ha Nohron ban ïaid da ka kjat sha Nongryngkoh, hynrei ki kali heh ki ïaid la ka ïaid namar la pynbor da ki paidbah ban kit ïa ki mar bam bad mar rep.
